「西方快車」嘅馬主榮大董呢次日賽重金禮聘莫雅來港客串，希望可以替愛駒取得勝仗，贏完呢場經典一哩賽後，便可穩奪打吡資格。大家都知，搵呢類世界高手嚟香港客串，出場費動輒幾十萬，再加埋頭等倉機票，酒店住宿，分分鐘一百幾十萬找數閒閒哋，當然「西方快車」馬主財力雄厚，呢筆錢只係碎銀。由於重金禮聘莫雅目標清晰，馬房冇事冇幹，一定唔會用佢騎其他馬，因為假如替其他馬匹出場，陣上遇意外嘅話，騎唔到「西方快車」咁就大件事，筆出場費及機票住宿，都唔知搵邊個找。所以今次蔡約翰除「西方快車」搵莫雅上陣外，仲有兩隻馬都用上莫雅，一隻係「滿堂紅」，另一隻屬初出馬「當家精選」。呢兩隻馬蔡神仙搵得莫雅上陣當然有計，因為唔係蔡約翰認為有一爭本錢都唔會用莫雅。其中前主席夏佳理隻「滿堂紅」，呢次出戰直路賽，隻馬過往只跑過一次直路賽，就係今季一場二班賽得第十名，最近一仗落番三班跑田草千二米，都係冇乜走勢。不過，經過呢幾場熱身，近期見「滿堂紅」經已有番火氣，狀態步入佳境，大家只要查一查隻馬去季成績，跑三班賽前後十三次，有七次上名成績，交出一冠四亞兩季，咁樣經已證明隻馬跑三班賽隨時有爭勝本錢，咪睇今季佢跑嗰場直路賽輸得咁遠，查實二班賽無心戀戰，一心寓賽於操，呢次跑番三班，即使路程無根據都有本錢贏馬，更何況有莫雅助陣，半冷更值得一博。