■Twins為美國巡演綵排。香港文匯報訊 Twins本月19日將到美國巡迴演出，日前兩人放完年假便收拾心情，開始為演唱會作綵排。阿Sa、阿嬌今年也出外度歲，阿Sa去了泰國， 阿嬌就去了日本過生日再到台灣過新年。
過年前，阿Sa過勞胃酸倒流，引致聲帶水腫發炎，不停看醫生針灸之後，已經好轉中，但醫生建議她最好休息大半年少說話不唱歌，阿Sa坦言根本不可能做到，因為除了要去美國演出，三藩市又有歌迷見面會之外，接下來的巡演也非常密集， 包括到內地、大馬等地，阿Sa說：「我已經好聽醫生話，努力改變自己的生活習慣，我戒咗瞓前食嘢，聽晒醫生講，現在每日早上七點至九點期間，要起身食飯。我叫工人姐姐煮定飯，叫我起身食囉，真係身體好咗，把聲都開咗好多。針灸要針埋個鼻，其實幾痛，不過針完之後我發覺又幾好，黑眼圈都好似細咗，之前克勤哥哥都有同我講，佢都試過聲帶有事搞咗年幾先好得返，我希望我後生過佢，可以快好過佢啦，哈哈。」阿嬌表示自己都一樣，早上7時至9時要食飯，因為之前荷爾蒙失調，胖了廿磅，之後營養師調節回她的飲食，才慢慢減下來。
阿Sa推測今年行桃花運
問到兩人今年情人節如何度過，阿嬌說：「我係日本做嘢囉，都冇情人。」阿Sa一樣， 不過是去紐約時裝節，阿Sa說：「我個髮型師已經借啲意帶埋女朋友一齊去啦，我咪唯有做佢哋兩個電燈膽囉，坐喺�哋中間整蠱佢！我冇情人你都咪使旨意過情人節！哈哈！ 但係我覺得我今年可能會有桃花運行喎，因為每年我媽都會幫我過年買桃花，舊年桃花開得好好，但係我一個情人都冇。今年有了！因為我去完泰國返屋企，發現我屋企桃花竟然係一粒花都冇，得返啲樹枝！我問工人，問媽咪『點解會咁』，但冇人答到我！ 咁照舊年開晒花但冇情人的情況，今年冇花就一定有情人啦！哈哈！ 」