■尹兆堅指斥曾俊華偷換概念。選舉時玩吓溫情本來無壞，但得到咩效果有時真係好難講。特首參選人、前財政司司長曾俊華大前晚發帖，話太太特登下廚幫佢煮晚餐，又指晚餐好重要，代表家人相聚或辛勞一天的獎勵及總結咁話。職工盟同工黨就借題發揮，話好多打工仔目前都要捱長工時，OT到夜一夜，返到屋企都無心機煮飯，要佢承諾標準工時立法喎。不過，鬍鬚曾喺政綱度已經講咗唔會一刀切立法，唔知佢會點拆呢？
鬍鬚大前晚（9日）在fb發帖介紹自己當日晚餐──由多年未下廚的太太煮的豬扒豆腐飯，還有火龍果，羅漢果及果皮水。Sell吓家有賢妻的同時，他不忘借題發揮，「晚飯是香港人最重要的一餐，它代表了與家人的相處、朋友的相聚，或是辛勞一天的獎勵及總結。最近密集式與選委會面、聆聽意見，有時只能隨便食個三文治就要趕下一場，如果你問我，今晚的『豬扒豆腐飯』值幾錢，我只能答，無價。」
反對派選委「民主300+」中好多人想「造王」，但喺「300+」中的少數甚至無票嘅人，跟大圍就一定撈唔到屬於自己嘅政治利益，所以都要講吓嘢攞返啲存在感。職工盟就在鬍鬚的fb留言，「曾生，其實好多支持你嘅香港人都好想早啲返屋企食飯，晚飯對佢地（哋）都好重要，可惜佢地（哋）好多都要捱長工時，OT到夜一夜，返到屋企都無心機煮飯。......唔知你又會唔會承諾如果當選，會立法標準工時，等佢地（哋）可以同家人食晚飯？」
工黨社民連揶揄博Like
與職工盟「兩位一體」的工黨，其主席胡穗珊當然跟機，發帖道：「其實呢，有標準工時先可以多啲返屋企食飯，做住家男人。」她還標註了「PR係唔可以當飯食」。該黨前立法會議員何秀蘭也稱：「鬍鬚，咪齋寫溫情帖博like，畀多d（啲）勞工權益出黎（嚟）睇。」社民連成員施城威也加把嘴揶揄道：「無標準工時，兩公婆都要為口奔馳的可以食幾多餐無價飯？」
鴿黨議員諷「搵老襯」
鬍鬚在政綱有關處理標準工時的部分指，「我們會充分考慮社會各界對標準工時提出的意見，盡量促成勞資雙方達成共識」，「由於不同行業及職位有不同的工作需要，不應用一刀切的方法去處理標準工時。我們可以合約為本，透過勞資諮詢由政府訂下合約基本條款。」唔知道鬍鬚今次會唔會因為咁，改口話有得傾呢？相信大家都要拭目以待嘞！
講開又講，此前傾向支持鬍鬚的民主黨，其立法會議員尹兆堅此前在評論標準工時委員會建議以立法方式，規定僱主與工資較低的基層僱員訂立書面僱傭合約的消息時，就宣稱「想將『合約工時』取代『標準工時』蒙混過關，三個字講晒：搵老襯！」似乎用來講鬍鬚都同樣適用噃，民主黨又會唔會要求鬍鬚交代呢？ ■記者 羅旦