呢個禮拜跑港澳盃，今年只係列為一班賽，可能有關方面見澳門馬實力唔係咁高，所以由級際賽變為一班，不過澳門方面依然好熱鬧地參與盛事，有六隻馬派過嚟出賽，「江河寶寶」應該係外隊馬賽績最好，跑過廿二場，總共有十一場頭馬，你話勁唔勁，所以，大家喺呢場港澳盃要吼外隊馬嘅話，不妨留意吓吽C而論最具意義，就係細摩個仔霑士摩亞，佢自從接咗老竇個倉後，成績都算平穩，呢次派出「滿貫福星」渡江競逐，呢隻馬今季贏秋季錦標大賽，成績都唔錯，屆時如果捧走呢個港澳盃，就真係拍得住老竇細摩咁威水，因為二○一○年嗰屆，細摩就係憑「爆料」捧走港澳盃，假如個仔霑士摩亞都可以捧盃，真係成為佳話。
當然，霑士摩亞想捧盃，身為大伯嘅大摩未必會咁順攤，呢位盃賽王，真係有捧盃癮，好似上個禮拜兩場一級賽咁，「喜蓮獎星」及「明月千里」一聲唔該，兩個盃都擸晒，同行想分一杯羮都難，呢隻港澳盃，大摩都係常客，好似去屆咁，佢憑潘頓隻「飛來猛」由頭放到尾，氣走客隊高君濤隻「阿方索」。呢次大摩出一對馬「飛來猛」同「無敵飛龍」，兩隻都要睇，不過邊隻係主力真係要估，「無敵飛龍」季內次次近，上次經已好叻，跑入一席平頭第二名，呢次再出，雷神唔騎佢，馬房搵祈普敦，都想盡跑，不過，用上田泰安騎呢隻「飛來猛」，大家千祈咪睇少，一樣有能力贏呢場港澳盃。
大家睇睇田泰安都唔係第一次騎呢隻「飛來猛」，早前跑場千四米，佢鍊輸俾莫雷拉隻「有得威」及潘頓「威力川」打入冷腳，咁即係講，大摩唔會理呢隻馬幾多倍，跑得就跑，廄侶「威力川」雖然熱門被人睇好，但一樣冇讓路心態，今次「飛來猛」抖咗個半月先至跑呢場一班賽，是有機會取得蟬聯。