「奪冠」及「爭分奪秒」唔講大家未必知佢哋嘅關係，前者乃鍾建書所有，至於「爭分奪秒」就係佢令郎鍾建歷嘅馬。養馬講運氣，好似佢令郎隻馬咁，出親都有前列成績交出，呢啲馬係名下愛駒唔開心就假，不過，佢老竇養馬咁耐，可以話乜都睇到化，最緊要隻馬跑得開心，講養馬運暫時是鍾建歷好啲。「爭分奪秒」呢個禮拜出戰第八場三班千二米，雖然屬初跑，隻馬喺香港六戰全部係千四米，成績屬兩冠三亞一季全上名，不過首次跑千二米，大家會有啲戒心，但有經驗嘅馬迷都知道，由長縮程跑短，蔡約翰訓練嘅馬，十隻九隻得，佢替「爭分奪秒」部署過六仗千四米，乜性能都知道晒，今次突然同佢報跑千二米當然有佢理由。馬房手足透露，「爭分奪秒」跑得好嘅時候，必定好好火，最好火嗰陣時，佢經常將身邊啲馬當係敵人，甚至乎經常撩交打，又或者發出聲響，向身邊馬匹作出挑釁，當每遇呢個情況，練馬師及副練都會吩咐馬伕將隻馬拉去較清靜嘅馬格，防止隻馬再撩其他馬打交。因為過往呢隻「爭分奪秒」有前科，就係同隔離馬格啲馬打交，雖然兩隻馬有圍板及間格阻隔，但見到佢哋互相打後蹄挑釁對方，搞到蹄甲全部移歪晒，所以要經常勞動釘甲師重新替「爭分奪秒」換過新蹄甲。最近呢隻馬又有此現象，由於火氣太犀利，倉主可能亦感覺到，以現時呢隻馬狀態及水準，未必唔適合在短途千二米一爭，所以有呢個部署是合情合理。