明日可以話係港澳盛事，一年一度澳港盃將會喺澳門舉行，香港隊有兩隻馬派往參戰，分別係方嘉柏馬房嘅「萬馬飛騰」及告東尼馬房嘅「醒目名駒」，計級數呢兩隻馬當然掃晒。
話說澳港盃已舉行過十三屆，今屆係第十四屆，之前十三屆澳港盃港隊馬只係贏過五屆咁大把，咁即係講今次港隊兩隻馬雖然實力高超，但未必一定贏梗，正所謂猛虎不及地頭蟲，呢句話一啲都冇錯，如果兩隻港隊馬熱得過分，大家真係諗諗澳門嗰邊啲代表，有鬥志之餘，贏出嚟分分鐘有可觀賠率，真係啱晒馬迷博彩心態。
除潘頓與雷神成為港隊馬代表騎師前往澳門外，郭能亦有份過去跑，不過佢唔係跑澳港盃，而係跑澳門打吡大賽，佢替「一樣美麗」披甲，大家都知「美麗」系喺香港一定要威，去到澳門一樣都要威，澳門班手足亦認為郭能呢匹「一樣美麗」，絕對有機會染指今屆打吡。而郭能嘅騎功實而不華，向來都受到各練馬師及馬主重視，周日香港呢一邊，沈集成隻「晚風」（圖7號）一早卜定佢出戰三班千二米草地，當然目標一早鎖定今場搏殺，其實上次跑一千米直路賽，馬房對呢隻馬狀態經已滿意，因為賽前馬房替呢隻馬彈咗課泥地千二米大閘，由巫顯東親自考驗，以一放到底姿態返嚟，所以大家不妨睇睇上場呢隻馬配巫顯東嘅賠率，只係得四倍，而呢場有「幸運美金」及「運財童子」等對手，佢都可以賣到咁熱，可見幕後幾咁有信心，不過，呢隻馬真係有個特性，休後第一場多數唔掂。大家睇睇佢季內初出嗰場，先跑場一千米直路賽大敗，熱完呢場身，轉跑田草千二即贏馬，呢個情景係咪同呢次部署有多少相似，上場巫顯東輸完場一千米直路賽，呢次轉跑田草千二米，馬房仲刻意搵強配，擺明又想故技重施。