跑馬贏錢講信心，好似近期高伯新馬房咁，搏起馬上嚟頭頭是道，好似嗰隻「無限欣賞」咁，告東尼都搞唔掂嘅馬，高伯新一接手第二仗就開齋，反映呢位練馬師果真有料到。好多弱勢馬房都有一個通病，成績唔好，旗下馬匹冇咁嘅空間去嘗試跑其他路程，驚輸得多會加快拉倉速度，搞到越跑越沉，結果成績未能達標。而高伯新就有大倉練馬師風範，乜都夠膽只信任自己嘅眼光，咁樣咪可以將低潮變高潮囉。呢次佢有隻「新威龍」，轉戰冇賽績可跟嘅泥地千二米，咁嘅部署雖冇乜特別，但令人注目係請到莫雷拉替隻馬壓陣。大家都知道，莫雷拉一場馬之中起碼有三幾個馬房向佢招手，假如大家企喺莫雷拉嗰邊諗，有咁多馬可以揀，點解偏偏揀一個弱勢馬房，兼且冇泥地成績嘅馬跑，答案顯然易見，呢隻馬喺莫雷拉心中經已判斷咗係一匹有機會嘅馬。查「新威龍」曾經跑過一場泥地千二米，嗰場由蔡明紹騎，輸七個幾馬位，不過，大家睇番「新威龍」最近彈一課泥地大閘嘅表現，呢課大閘安排喺三月二十一日由梁家俊試千二米，當時走位係6 7 2，早段楔入內欄食泥，入直路見鞍上人捐窿捐罅沿內欄搶入一席第二名，大家知唔知呢課大閘第一名馬係乜？之唔係上周末新勝嗰隻「勁精神」，而第三名係乜？就係嗰隻一出即勝嘅「承你所願」，呢課大閘充分表現出「新威龍」絕對係泥地相當適合進取嘅馬，難怪倉主一早卜定雷神，呢鋪真係要睇實。