上個禮拜六澳港盃雷神同潘頓替兩隻港馬出戰，雖然一如賽前所料會係港隊馬揚威，不過唔係雷神騎嘅「萬馬飛騰」贏，而係潘頓隻「醒目名駒」捧盃，咁都不特止，潘頓喺呢日澳港盃賽馬日連中三元兼贏埋打吡，仲執埋場新萄京盃，除獎金外，袋獎盃走都要搵個喼。相反雷神就場場無影，激到班捧場客死死吓。
潘頓該日連中三元，全部勝出坐騎都係跟前跑，其中打吡策半冷馬「非凡夫」更贏亞軍七個幾馬位咁遠。正所謂寧買手風順騎師，潘頓呢次夜賽，替蘇保羅「友瑩采」披甲跑一哩，遲熟馬落到五班形勢一片光明，大家睇一睇，蘇保羅今季所贏十九場頭馬，當中有九場來自潘頓，練馬師搵潘頓出馬，多數搏命格。「友瑩采」其實潘頓今季經已騎過一次，呢場跑田草二千米長途，一隻未贏過嘅馬，跑到咁長路程只係被捧到兩倍半大熱門，可以見到幕後自視甚高，可惜呢一仗，唔知係咪潘頓錯估隻馬進度，竟然全程外疊望空守二、三位跑，最終得第六名，輸三個幾馬位俾頭馬「財歡笑」，雖然呢仗輸咗，但由此可見「友瑩采」根本居五班係一隻上風馬。再睇最近一仗由田泰安策騎，呢場跑谷草一哩，一個完全唔同性能路程及場地，呢場「友瑩采」早段俾田泰安迫住守中間五、六位，其實經已跑得唔錯，最後全力衝刺，僅輸條頸得第四名，講真呢席第四名，只係輸些少運氣，假如拉士仲有二、三十米衝，臨門勁度以佢最強，田泰安未能替呢隻馬取勝只係輸少少運氣。大家再睇一睇，馬房替呢隻馬備戰咗一個月，期間又彈閘又辣操，目標堅定要在今戰收復失地，今次唔用田泰安，刻意轉用潘頓，倉主揀用高一個級別騎師，盡顯拚勝決心。而在季尾呢個階段宜捧質新馬，「友瑩采」呢類有班利四歲馬，五班豈會留得住。