大家記唔記得潘明輝開齋當日，上演墮馬要送院觀察，嗰日妠N係俾霍利時隻久休復出馬「上浦猛將」喺沙圈拋跌，要抖咗幾個賽馬日。事後有唔少人講，點解一隻成年冇跑過嘅馬，復出第一仗會用個從未喺香港跑過嘅十磅仔，呢個當然係問題，呢類馬成年冇出賽，十居其九屬遊馬河，加上脾氣大難馴服，潘明輝初出膽正命平當然樂於受命。今次「上浦猛將」角逐谷草千二米，大家睇睇霍利時用乜人，就係大師傅郭能，近期夜賽呢個馬房都好喜歡用郭能搏馬，好似上個禮拜又搵佢搏隻「育馬妙星」，再數前些日子嘅頭馬，「金獅叻將」及「爪皇烈焰」都係出自呢位英國猛將胯下，所以「上浦猛將」配郭能，絕對係一個搏殺組合。再睇呢季「上浦猛將」出賽嘅部署，呢次先至啱波路，因為大家都知道呢隻馬最煞食路程係跑谷草短途，一千米及千二米均有贏馬賽績支持，睇睇今季呢隻馬點出賽法，潘明輝跌馬退出嗰場，係報跑田草千二米，唔係好啱腳法，再出跑一千米直路賽，又係一場唔合腳法路程，當然係戰敗收場，目的只係想替呢隻馬熱一熱身仄吓進度，呢場之後，馬房即安排佢跑谷草千二米，賠率由一千米直路賽嗰場五十二倍，變成十六倍嘅半冷門，不過，呢場田泰安仲未跑番出呢隻馬爭勝水準。最近一仗隻馬跑直路賽，明顯唔啱腳法發揮，純粹寓賽於操，敗績可以抹去，今次返回最擅長嘅谷草千二米列陣，應該係時候還我真面目。