「承你所願」上場一出即勝，贏馬路程係田草千二米，今次增程跑千四米，估計一樣會被大眾馬迷捧成大熱門，不過同場中，上次演出令人失望嘅「快樂實在」，值得馬迷再追多次。上次輸過錢喺呢隻馬身上嘅馬迷，今次如捧「承你所願」嘅話，不如追多次「快樂實在」，仲有本利歸還嘅機會，話晒呢次佢嘅賠率一定唔會兩倍咁雞肋。「快樂實在」前次喺田草千二米取得第二名，輸俾「追風追月」，後駒經已升班去，證明呢一席亞軍屬四班頂水準，相反「承你所願」一出贏千二米，只係贏一隻初出嘅「快利」，後者再出輸到影都冇，咁樣大家可以比較一吓，「承你所願」呢場第一名水準有幾高，最多只可以話係四班水準賽事。不過，「快樂實在」呢次再跑千四米，佢就非常着數，因為上次被人捧到兩倍得第四名，末段衝刺凌勵大家有目相睹，當時走位係8 11 10 4，單從走位可以見到有車前倒後感覺，大家可以睇睇呢隻馬上場賽後報告。賽後報告係咁講呢隻馬跑過約一千米，鞍上人要收慢避開「飛越峰」後蹄，因為呢個時候嘅「飛越峰」有內閃傾向，再去到近終點前九百米，出現第二個情況，就係「快樂實在」鞍上人潘頓又要抽一抽，原來為避「快閃的」後蹄，呢一抽仲大鑊，同「常拼常勝」互相碰撞，總之大半程就係俾意外所累，就算唔輸一條街都起碼輸半條街，之後逐步追趕，最後衝番個第四返嚟，大家睇睇輸俾頭馬「海嵐一號」只係四分三馬位。講真唔係咁多意外，呢大半個馬位又點會輸，所以根本呢場千四米，頭馬應該係「快樂實在」，今次再跑呢個路程，G4藝人馬主馬德鐘，上次着到靚靚與太座入場準備拉頭馬，無功而還，今次應該可以一償所願，潘頓停賽改用郭能披甲，配搭一樣夠硬淨。