大摩隻「砂漿邦」季初配祈普敦喺田草千二米爆十五倍半冷門開齋，贏「勝利導航」等馬，後者近期喺二班贏「喜旺寶」，顯見「砂漿邦」並非等閒之輩。其實隻馬嗰場贏「勝利導航」，本身狀態只屬初起，憑多少質素，加上祈普敦好鬥志，所以造就到「砂漿邦」爆冷成功。監生吞爆完冷嘅「砂漿邦」其後進度徘徊唔出奇，因為呢個馬房今季仲有隻「蓋世之寶」屬同一性質馬，亦係贏完馬後連續多仗都無表現。而「砂漿邦」直到最近場田草千二米用潘明輝隨便跑跑，又俾佢無心插柳下跑入一席第三名，呢個成績，明顯指出隻馬狀態又有料到。不過，上次「砂漿邦」露出回勇走勢之後，馬房今次唔係同佢出戰有根有據嘅田草千二米，而係膽粗粗出戰冇賽績根據嘅泥地千二米，呢個部署證明大摩對呢隻馬能力幾咁有信心，事關呢隻馬來港前未跑過泥地，就算來到香港，連一次泥閘都未試過，點解大摩對佢跑泥地咁有信心，其實，大家可以睇吓呢隻馬血統背景，咁就明白一切。「砂漿邦」父系「街頭波士」，昔日喺陣上是一匹循序漸進賽駒，跑到四歲屬泥地短途好手，十三戰獲七冠三亞一季，取勝路程由千一米至千四米，包括兩項美國年長馬組別嘅一級讓賽，配種後其中一隻子嗣Danza，在肯塔基打吡（一級賽）跑入第三名，除此之外，2016年美國肯塔基橡樹大賽（一級賽）經典盟主Catheryn Sophia，亦係出自「砂漿邦」之父，所以大家可以認識一下，此駒父線是匹跑沙泥地非常擅長嘅一族。大概大摩早已知道此駒嘅泥地性能背景雄厚，所以狀態進一步轉佳下，跑泥地必可博到分頭，今次配上巫顯東，此子近期夾大摩馬演出亦準繩，最近剛贏完隻「駿馬翹楚」，只要呢個倉有實力分子交俾佢騎，必定全力以赴發揮出最佳水準，所以值得大家信賴。