轉倉馬鬥志一定好，尤其嗰啲大倉肯接收嘅馬，通常大倉唔會亂咁收馬，除非隻馬有前景。好似方嘉柏咁，接收轉倉馬唔多，不過今次就有隻「赤兔寶駒」，係由何良倉轉入方嘉柏旗下，操到滿意先至上陣，所以鬥志毋須懷疑，尤其是配潘頓。呢隻馬幕後自視好高，今季隻馬由蘇兆輝贏完場千四米後，矛頭直指打吡，不過，跑打吡係二千米賽事，呢隻馬來港前只贏千六米，在港最叻去到千八米上名，當然去到跑打吡，長力受到考驗，結果大敗而回。幕後唔知係咪對呢個賽果唔多滿意，所以立刻轉倉。其實，呢隻馬喺何揹氶A馬房經已積極想搞番韁口問題，因為隻馬一望空就會亂衝，鞍上人要留都唔容易，所以蘇兆輝同郭能跑呢隻馬嘅時候，早段要混喺馬林，入到直路先至搵位衝刺，但好多時要搏位就會變成跑法被動，成績亦受到影響。「赤兔寶駒」轉入方嘉柏馬房後，馬房積極喺教口呢方面，而且漸有改善，上個禮拜五（即報名前幾日），刻意請潘頓彈課泥地千二米大閘，起步鞍上人刻意留守馬林後面，不過，呢次所見「赤兔寶駒」早段留得好順，轉到入直路，鞍上人稍為搖動兩下韁繩，隻馬自動搵位上，終點前撲得第三名，只係輸俾呢課大閘頭馬「爭分奪秒」大半個身位，假如睇呢課大閘，佢同「爭分奪秒」都係咁靚，但論卡士「赤兔寶駒」有一班分量，加上賠率好過「爭分奪秒」，呢次隻馬跑番贏馬路程，大家想博有分頭，一定要吼佢。