鄭俊偉上次日賽尾場隻「嬴風雲」後上僅輸頭位俾「美麗寶寶」，後者鞍上人屬替工潘頓，假如由祈普敦騎番，真係未必能夠贏到「嬴風雲」，話晒潘頓之前經已贏過三次「美麗寶寶」，自然知道點樣至發揮得好。只能夠講鄭俊偉真係唔夠運，嗰日妐g已憑隻「劍飛聲」贏咗場頭馬，如果「嬴風雲」可以幫馬房起個孖，鄭俊偉就有十五場頭馬，咁樣計法去到季尾仍有大把時間爭取上岸。
現時馬房仲欠兩場先至上岸，一日未達標，倉主心情當然忐忑不安。呢次日賽馬房有乜好馬幫到手，數來數去就得一隻「好叻仔」（圖4號）。大家咪以為呢隻「好叻仔」係衰馬，經常熱門跑到冇影，其實，呢隻馬一路都進步緊，好似上次初跑谷草一哩，排一檔臨場得五倍，杜利萊騎都有咁硬淨飛數，當然有信心，點知杜利萊早段驚蝕位，一早俾幾步佢走，初段更冇有識死同嗰場頭馬「再創商機」鬥搶咗一輪，之後杜利萊見勢色唔對路，收番慢隻馬等轉入直路再衝，但上咗口嘅「好叻仔」又點會咁容易話收就收，結果人馬角力咗一段路程，轉彎入直路鞍上人見隻馬開始墮退即力騎，一直騎足全條跑馬地直路，最終只得一席第七名而回，大家可以睇一睇，呢隻馬只係輸俾頭馬「再創商機」三個馬位，咁即係講，如果早段佢唔跟「再創商機」鬥搶嘅話，呢隻馬足有條件跑入前三名，甚至乎跟「再創商機」一爭頭馬。其實，近兩場「好叻仔」喺杜利萊胯下都用擺前走戰術，兩次效果都係一般，而呢隻馬季初跑過一場田草千二米，全程大墮後直路衝一程，走位係13-13-14-2，得一席亞軍僅以一頭位輸俾「喜悅繽紛」，所以今次冇用杜利萊上陣嘅「好叻仔」，改由田泰安執韁，相信呢位冷殺手有權將「好叻仔」來個大變身。