告達理早前因健康問題，唔係點理廄務，直至近期健康好番先至全面投入工作，好似一啲操馬工作，現時經已見番佢下午親自替馬匹操練，所以呢個倉嘅戰馬，又有留意必要。講到倉主近期最緊張嘅馬就係「馬來之珍」，經常午間替呢隻馬喺地堂踱步，畢竟呢隻係五班馬，倉主咁重視，即係話短期內必有佳作。事實上，睇番近兩仗「馬來之珍」嘅表現，連續兩次取得季軍成績，表示馬匹狀態開始復甦，今季到目前為止，隻馬仲未贏過一場，話晒上季呢隻馬能跟「勁豐裕」鬥到得平頭冠軍，所以，馬房好希望短期內能夠替呢隻馬重啟勝門，難怪告達理健康一好番，就當呢隻五班馬係寶，親自備戰。講真呢隻「馬來之珍」最佳射程都係千八米或以上路程，今次馬房同佢報跑田草千八米，呢個正係佢最適合出擊路程之一，事關過往呢隻馬曾經喺四班贏過，如今落到五班點都有多少着數。當然有人講，此一時彼一時，四班贏田草千八米，經已係三季前嘅事，現時「馬來之珍」已八歲，未必可跑出水準，呢個講法，當然有合理之處，但亦好簡單咁講，一匹健康正常馬，落到五班上陣，點都有作為，更何況本身係隻識贏嘅馬。「馬來之珍」幕後夠耐性，隻馬大前季四班打疊贏過兩場後，升上三班跑無功，其後落到五班先至贏番場平頭冠軍，如今賽事殺到季尾階段，呢類冇傷冇病馬喺倉主大力打磨下有番爭勝水準，屆時用上梁家俊，相信可東山再起。