今次夜賽賀賢所派出戰馬實力不弱，喺周一試跑日，佢下午專登安排「飛馬再威」副練李兆錚、「順勢寶」（圖7號）劉家泰及「慣勝聆聽」女騎馬人踱步十分鐘左右，然後休息十分鐘，之後拖到游泳池游水一圈，實行炒兩味打磨，據馬房手足所透露，倉主非常留心觀察呢三駒，「飛馬再威」神態內斂，落腳輕盈兼有力，狀態保持贏馬時候水準；「順勢寶」肌肉鐵一般紮實，且神氣十足，一啲疲態都冇，呢隻谷草短途好手真係時刻都有番咁上下水準；至於隻「慣勝聆聽」，喺機坪踱步時候，太陽照射底下毛色光令程度可以照鏡，呢隻馬轉投賀賢之後，論狀態係季內最弗一次，千祈唔好因為加程跑千八米而睇小佢。
海都巨星疏仙痊癒
蔣嘉琦今次夜賽雖然有五匹坐騎，但大家有冇發覺呢五駒當中冇一隻係出自佢師父呂健威馬房，通常有咁嘅現象，呢個馬房必有出擊手影。當然，呂廄都會用蔣嘉琦當殺手，不過，只係當嘉琦妹手風順時先至會多用，手風麻麻哋時候，呂健威都好識得用人之道，唔會死牛一邊頸，唔識得轉彎。
今次夜賽，呂健威出馬唔多，僅得三駒，但呢三隻馬均用上唔同類型騎師上陣，「獵狐者」史卓豐、「海都巨星」黃皓楠及「快樂生活」楊明綸，大家睇一睇，練馬師咁嘅安排，一定有佢嘅心思，當中有兩隻馬，倉主近期非常緊張，呢兩隻就係「獵狐者」及「海都巨星」，到目前為止呢一對馬都未嘗一逞，撇除質素問題，最大關鍵都係健康因素，唔講大家未必知，呢兩隻馬本身有疏仙毛病，情況都幾嚴重吓，所以，當隻馬有表現時候，下次再出未必能夠交番出水準，馬房當然知道呢個問題，所以近期經已對症下藥。馬房目前經常用冰水替呢兩隻馬浸腳，情況有咗改善才報戰今場。倉主周一成日逗留喺馬房，原來等釘甲師到馬房替呢兩隻馬換銻甲，事關患有疏仙毛病馬匹，對於釘甲都比較敏感，一有問題便立刻浮現出嚟，好彩呢兩隻馬經過換甲後，再由倉主驗過，而且一啲問題都冇，今次呂健威呢一對戰馬，大家都要份外留神。
精算博奕雷神搏殺
除呂健威及賀賢兩個馬房有出擊手影捉之外，仲有一個大倉蔡約翰要睇，埋門佢一樣對旗下戰馬咁認真。手足指排位日佢由凌晨四點幾入倉，一直去到下午先至收工，都係留喺馬房睇馬，一步都冇離開過馬房。呢日蔡神仙安排副練羅富全策「精算博奕」及「喜悅繽紛」華籍騎馬人到機坪踱步，踱步完畢，又安排呢對馬到泳池游水，備戰非常認真，其中上次替「精算博奕」跑入亞軍嘅何澤堯，對自己陣上發揮未盡滿意，即使今次佢俾人飛咗，馬房轉用莫雷拉披甲，佢亦無怨。至於「喜悅繽紛」，季內長期保持良好水準，今次埋門準備過程亦充足。另外馬房仲有「運財童子」及「輕彈錢暢」埋門多數以踱步及游水慢工夫磨練，有時加埋照燈，因為蔡神仙認為呢對馬比較適宜儲火跑，所以唔做多快磨工夫，倉主咁有心得催谷呢一批戰馬，提防今次夜賽蔡神仙提早作出總攻擊。