■戇橋同陳淑莊跳到摸晒心口，但班鬼佬睬佢都傻。 fb截圖立法會議員公務繁重，壓力大就梗㗎啦，不過每個議員嘅減壓方法都唔同，有啲好正路，有啲就好「獨特」。好似公文袋（公民黨）黨魁戇橋（楊岳橋）咁吖，日前就喺熟食中心飲大兩杯，同黨友陳淑莊聞歌起舞，但就跳到甩晒beat（節拍），拍馬都追唔上有舞台劇底子嘅對方。不過，佢哋覺得係開心舞啫，啲網民就覺得係馬騮戲、萬聖節嘞！
陳淑莊日前喺facebook上載咗呇P戇橋跳舞嘅短片，背景係北角渣華道熟食中心，當時播住「哥哥」張國榮隻《無心睡眠》，佢兩個就聞「哥」起舞，陳淑莊跳得都算流暢，但係面紅紅疑似飲大咗嘅戇橋就甩晒beat，而佢哋面前嗰枱鬼佬仲好笑，影完兩幅相之後就無理佢哋繼續夾餸！陳淑莊仲話自己當時着住三吋半高踭鞋，而戇橋班助理開嘅fb專頁「810扮工室」，亦都寸佢哋老細受酒精影響。
「本土派」不滿跳舞呃like
可能佢哋覺得咁就叫「親民」啦，不過唔係個個都受落。好似經常發表激進「本土」言論、由中文大學學者劉正打理嘅fb專頁「無神論者的巴別塔」就話：「會又唔開、票又唔投、跳埋呢啲×舞呃like（讚好）咪最醒囉，『尊貴的』垃圾會議員？我呸！」
「Jason Cheung」就補充話，公文袋試過提出動議之後全黨缺席會議（指今年3月郭家麒提出嘅「促請下任特首重啟政改」議案），又試過同一議案大包圍投贊成、反對同棄權（指上年7月二讀表決《醫生註冊（修訂）條例草案》），「想問吓楊岳橋究竟做乜唔開會，都畀佢hide（屏蔽）留言，除咗一次話屋企有喪事就冇解釋過，可能次次都喪事啦，不如佢辭職去守孝啦。」
「藍絲」fb專頁「追擊暴徒」亦都分享咗條短片，仲溫馨提示網民「慎入」、「小心影響食慾」。不過「Desmond Wong」就覺得佢兩個除咗影響食慾之外，仲影響埋隻歌同埋間餐廳嘅生意，「李國霖」就不滿佢兩個「喺外國人面前做小丑呀？」 ■香港文匯報記者 陳庭佳