林 作
雖然我唔多炒股票，但係都留意到近期一隻上市嘅新股。超額認購620倍，中籤率僅為7.72%，可以話係近年最受歡迎嘅新股，佢就係閱文集團（0772）。
除咗呇n炒得之外，另外一個令我留意到嘅地方就係佢嘅業務性質--中國網絡小說營運平台。近年，網絡小說喺內地非常盛行，亦都出產咗好多經典系列，例如《誅仙》、《魔法學徒》等等，全部都成功由網絡小說出版實體書，賺到盆滿缽滿。根據統計，當今版稅收入最高的作家就是今年只得36歲的唐家三少，他以1.22億元人民幣連續5屆蟬聯榜首寶座。以上嘅人同埋書通通都未聽過？唔緊要，但係至少之前喺大台播出嘅兩套電視劇《瑯琊榜》及《無心法師》相信點都會有些少印象。上述兩套電視劇，其實都係由人氣網絡小說改編，而作者自然名利雙收。
雖然網絡小說非常盛行，但要做一個網絡作家其實絕對不是一件易事。首先，現在網絡上已經有海量嘅作家同埋作品，而且質素非常參差不齊，要喺其中脫穎而出絕不容易。其次，要以小說作家為生就必須同網絡小說營運平台簽約，然後按訂閱數量作分成。
但現在網上有極多嘅盜版小說網站非法免費轉載小說，令到作家嘅收入受損。最後，就係內地對網絡小說尺度管制極嚴格，例如什麼書中男女角色關係最盡只能去到牽手（《尋秦記》表示......），較敏感字眼如「胸」、「呻吟」等等需要刪除，令到寫作自由大大減少，所以要像上文的唐家三少等人成功實非易事。
不過，我依然對網絡小說非常看好，因為佢已經成為好多人日常生活中不能或缺嘅一部分，而且並唔係電視劇或者遊戲可以取替的。如果各位文科畢業生暫時搵唔到工嘅話，不妨試一試喺呢個領域發展一下。而我呢個理科人，當然無呢個能耐，唯一可以做嘅大概只有在閱文上市之後搵個靚價位入返幾手貨。