雷神嘅戰馬雖然配搭堅強，但贏唔贏得都係五五波，因為搵得佢出馬分子，當然有啲問題要克服，有時問題解決咗，練馬師又未必搵雷神呢位騎牛都會變成熱門嘅騎師上陣，只要換一換人，可能博到名利雙收效果。今次夜賽，原本由雷神騎過或騎開嘅戰馬之中，有三隻幕後專登唔用雷神披甲，捉路計呢類馬必然有拚勝信心，當然冇雷神贏面係咪低啲，呢個咁嘅心理關口，大家一定要克服，只要諗深一層，即使呢類飛起雷神嘅馬，真係贏唔出但能入位，起碼一W一P落注亦唔會血本無歸，相反雷神坐騎W唔出得個位置，可能本金都唔見一大橛，買WP未必可保不失。
呢三隻幕後專登飛起雷神嘅馬，第一隻先講「金剛秀」，季內三戰全部上名，即使最近一場跑番四班賽一樣有入位成績。上次夜賽，馬房替呢隻馬出戰四班千二米，可惜未能以正選身份列陣，不過，莫雷拉該場冇馬列陣，亦自告奮勇當「金剛秀」嘅後備騎師，呢場「金剛秀」只是負一一五磅跑，雷神當後備騎師，相信都會做一切節食安排，如果唔係賽日前真係補上列陣，到嗰陣時減肥焗汗打孖上都未必掂。
今次「金剛秀」列陣第五場四班千二米，馬房再唔搵雷神，而轉手由巫顯東執韁，馬房有信心巫顯東一樣可以跑出水準，事關呢位小伙子近期贏「埼豐」跑出彩虹，深得倉主歡心，今次「金剛秀」負一一四磅跑，雷神更難造磅，唯有益吓巫顯東。周日下午，倉主專登召巫顯東返倉替「金剛秀」喺地堂踱步，同一時間，仲安排咗隻高班馬「神舟小子」由副練何敬森作伴走花蹄，兩隻馬狀態都醒神，有人問「金剛秀」現時四十一分，會唔會等減埋嗰一分落五班才郁手，但有謂兵不厭詐，上周末何良「大收成」又係四十一分馬，有賠率有狀態點會等來等去。
輕彈錢暢唔孭死鉛
另外一隻係蔡神仙隻「輕彈錢暢」，季內由何澤堯跑過場谷草千二米，咪睇隻馬九十九倍列陣，但跑返嚟一啲都唔曳，只係輸俾頭馬「指揮官」大約六個身位。經呢場熱身後，復課勇熟程度更令人有好感，雖然今次唔係由雷神執韁，馬房用上蔡明紹，呢位亦屬蔡神仙喜歡所用嘅冷殺手，由於負一一七磅關係，馬房想用一個唔多需要負死鉛嘅騎師，蔡明紹體重與「輕彈錢暢」呢次負磅差唔多，所以都係適合搏殺人選，大家咪以為雷神唔騎嘅蔡約翰戰馬機會就弱啲，有賠率嘅馬，其實一樣值得吼。
英之友能本利歸還
仲有隻「英之友」，上場用雷神披甲跑一千米直路賽，呢隻馬狀態經已起咗，用雷神都跑唔出水準，道理好簡單，大家睇睇呢場頭馬正是蔡約翰馬房「旺蝦王」，雷神唔幫幫手，相信「旺蝦王」連十七蚊獨贏都冇。「英之友」今次轉戰谷草一千米，馬房決定飛起拉叔，用近期手風順到不得了梁家俊，呢位仁兄，熱又贏冷又爆，喺周一最後試跑朝，佢操完馬後立刻入倉睇「英之友」，在場與倉主再仄馬，又密斟一輪，睇呢隻馬有台型有速度，轉戰谷草一千米短途，隨時可以本利歸還。