■高海寧(右)昨日的性感度搶晒龔嘉欣鏡。香港文匯報訊（記者 梁靜儀）高海寧（高Ling）與龔嘉欣昨日到將軍澳出席《 Popeye×Betty Boop Xmas Kitchen》，二人吸引不少「龍友」圍觀拍照，高Ling更無懼「限性感令」穿上吊帶低胸裙谷胸上陣，而嘉欣就封胸只輕露纖腰。
高Ling與嘉欣又即場炮製特色便當及調製健康特飲給現場觀眾試飲評分，結果一面倒投高Ling一票，搞到嘉欣扮嬲嬲豬，而當高Ling俯身時，現場閃光燈即閃個不停。
高Ling受訪問時透露近日患上感冒未癒，但晚上仍要為新劇《BB來了》拍攝一場淋雨戲：「天氣又轉冷仲要拍通宵，我帶定好多暖包同保鮮紙。」問到緋聞男友鄧智偉可有關心她？她甜笑說：「佢好忙，不過都有。（認戀情？）朋友好忙，問來問去我都係得一個，我好專一。」 她表示聖誕節要忙於拍攝劇集，要拍到明年三月中，也沒時間選購禮物及外遊，她又笑說：「兩個人一齊如果係開心，每日都係聖誕節。」默認與男友感情穩定。
問到會否下廚煮聖誕大餐？她謂雖然自己識煮食，但卻很少為別人下廚：「留返將來老公先，反而我試過佢煮豉油雞，好得。（佢會探你口風鍾意食乜？）佢每次煮唔同菜式，中西式佢都識，最好味都係鼓油雞，（綁住你個胃？）暫時啲嘢都幾好食，希望維持到。」
龔嘉欣呻過Lonely Christmas
嘉欣表示近日正忙拍《堅離地愛堅離地》，早前生日也要在工作中度過，更被黃心穎掌摑了三巴掌：「拍之前心穎已同我講話如果打到唔好意思，呢場戲NG咗三次，共摑咗三巴，佢每打一巴就同我講句生日快樂，大家都笑我今個生日好特別，我都係第一次拍戲俾人摑，之前都係我摑人，不過俾人摑壓力冇咁大。」嘉欣又主動提到與契細佬吳業坤（坤哥）的緋聞：「近日好多人話我係坤哥正印，佢雖然靚仔，但唔係我杯茶，姊弟戀唔啱我。」問到聖誕節將如何慶祝？嘉欣大呻沒人邀約，可能要一個人過寂寞聖誕，又可能衝動起來一個人去旅行，她說：「成日想凍冰冰有人攬住。」