梁振輝 香港資深出版人
街市某菜檔，有一名主婦擬購買一些薑。
「生果婆1」：「師奶2」，唔使摸嚟摸去嘞，我哋啲係「本地薑」，有保證嘅！
師奶甲：下，「本地薑」；「本地薑唔辣」個噃！
生果婆：「本地薑唔辣」係譬喻嚟，唔係真係話佢唔辣嘅！
師奶甲：咁畀半斤我喇。
另一名主婦擬購買一些蒜頭，可她幾乎把所有在該處的蒜頭都拿上手把弄過。
生果婆（看得挺不耐煩）：摸嚟摸去，係咪買㗎？
師奶乙：摸起至知有冇爛，唔摸過點買呀！
該名主婦沒理會生果婆所言，仍繼續左摸右摸。
生果婆（用「兇3」人的語調）：唔係幫襯，「摸下都當你『偷薑』」！
師奶乙：「唔係嘛4」，係都係「偷蒜」啫！
翌日，婷婷和輝仔在返校途中。
婷婷：輝仔，琴日我去街市幫阿媽買餸，聽到啲都幾得意嘅嘢！
輝仔：你買你嘅餸，咁「八卦5」做乜？
婷婷：邊係啫，嗰啲嘢久唔久我都有聽到，不過唔係好知點解。
輝仔：婷婷，講嚟聽下，睇下我幫唔幫到你。
婷婷：呢，先頭有個師奶......後尾又有個師奶......
輝仔：哦，你係講「本地薑唔辣」，同埋「摸下都當你偷薑」呢！
婷婷：就係囉！
輝仔：本地薑辣唔辣我就唔知，不過好多人都話「本地」嘅嘢冇「出面」嗰啲咁「馨香6」。
婷婷：講真，「薑」，cheap（便宜）嘢嚟咋喎，要偷都唔係「偷薑」喇！
輝仔：我諗「偷薑」個意思係，你夠膽「偷」就真係夠「薑」嘞！
婷婷：咁乜叫做「夠薑」呀？
輝仔：「夠薑」咪即係夠晒火辣囉！
婷婷：嗯......信唔過！
輝仔：唔信「罷就7」！
「本地薑唔辣」當中的「本地薑」比喻本地事物，「辣」則用以形容其水準的高低以及其受重視的程度，而這裡的「唔辣」是指本地事物的水準不及外地的，外面的就是格外矜貴。
與「本地薑唔辣」遙相呼應的有：
●本地香未芳；本地狗屎無肥【台】
●貴遠賤近
●山雞想水鴨
●這山望着那山高
●近廟欺神
●遠來的和尚會唸經
●隔岸風景好；鄰家芳草綠
●The moon is fuller in foreign lands.（外國的月亮特別圓）
●The grass is always greener on the other side of the fence.（籬笆另一邊的草通常比較綠）
一直以來，政府都聘請外地專家做某些大型項目的顧問；現時從海外回歸祖國的留學生，俗稱「海龜」（「海歸」的諧音），大多在社會上位高權重，難道真的「本地薑唔辣」？說穿了，這是一種既媚外且自卑的心態，而這也是殘留在中國人骨子裡的普遍心理狀況。
據筆者的理解和考究，「偷薑」和「夠薑」中的「薑」各有所指。「夠薑」應是由「夠強」演變過來，不過「強」讀時音變而讀成「薑」。由於「夠強」指足夠強大，「夠薑」有時會用以形容人膽識過人、有勇有謀；但多用以形容人胆大包天、肆無忌憚、匹夫之勇，甚或心狠手辣，所敢於者不外乎是一些負面或違紀的事情，如：在課堂上公然頂撞老師；駕車時蓄意衝紅燈；在沒有安全措施保護下徒手攀緣大廈外牆。對香港人來說，最經典的莫如香港歌手許冠傑在某首粵語流行曲中的一句歌詞--夠薑就揸槍走去搶。話說回來，以代表火辣的「薑」作諧音也很貼切，因一般認同「夠火辣」才「夠膽量」。至於「偷薑」，此詞應由「偷搶」演變過來，不過「搶」讀時音變而讀成「薑」。「摸下都當你偷搶」的意思是，警告人家別摸，摸一下就當你偷搶！其實，一摸就當偷搶，好像誇張了點，大概是說你有所企圖罷了！除了「摸下都當你偷薑」這講法，也有人講「望下都當你偷薑」和「問下都當你偷薑」。如是者，大家不要隨便地「摸來摸去」、「望高望低」以及「問三問四」，否則就給人誤會你不懷好意的了！
最後，筆者寄語時下的年輕人，要弄清一點--不敢去幹不合法的事情不等同不「夠薑」，只是因不合法而不為，即非不能也，實不為也。
_____________________
1、「生果婆」，生果檔的女檔主的俗稱。
2、「師奶」，嫁了的女子的俗稱。
3、「兇」人的一方，一般聲大夾惡，以迫使對方懼怕、就範或不敢冒犯或作進一步的行動。
4、近年，香港人會在講「唔係（呀）嘛」時把「嘛」讀成「花1-2」，可這不是正統的變音。
5、愛理閒事，即「諸事理」，簡稱「諸事」。「八卦」象徵宇宙結構及「諸事」的變化，廣東人就叫「諸事」做「（諸事）八卦」。
6、「馨香」原指芳香，現比喻為人所重視。
7、「罷就」從「『就』此作『罷』」演變過來。
【專欄簡體版】https://leoleung2016.wordpress.com/