■陳國強出蒲撲水，親范國威陣營的韓連山即潑冷水，惹來強粉圍攻。fb截圖一個立法會議席真係好吸引，宣「獨」嘅沙田區議員陳國強，之前已經話要玩埋一份，參加今年3月立法會新東補選。1月1日，佢就出個蒲（post）話要借錢參選，仲話年息10厘添。不過，所謂多個香爐多隻鬼，一直撐「新民主同盟」范國威（咖喱飯）嘅所謂「保衛香港自由聯盟」韓連山就試圖以其他理由去勸退對方，話佢會分薄「民主派」票源等等，結果就俾對方嘅支持者鬧到趴喺度，叫佢早唞喎！
出蒲10厘借貸 承諾聖誕還債
陳國強喺蒲度首先揶揄其他反對派經常搞眾籌，話「眾籌是不義行為」，又稱當「義士」（「港獨」分子）正缺錢支援之際，他再向「兄弟」籌款去參選，不合「正義原則」，故「仔細考慮後，我們決定只接受借款支援，年息十厘，今年聖誕節還清，求各方兄弟盡借」，仲要人留低聯絡電話同銀行戶口號，「今年聖誕節前本息自動入帳（賬）」喎。
韓連山潑冷水 強粉鬧霸道
韓連山就留言話陳國強「傻的嗎」：「第一，你連閘都入唔到；第二，如果入到，更被人認定你受中共『祝福』，推你入去分薄民主派票源，協助保皇派當選，從此你更被港人確認為中共的人；第三，高調『借錢』參選，中共必助你一臂之力，錢的來源你明白的。強兄，要玩立法會選舉，等多議席多票制才加入吧。......（借錢）這舉會永不返（翻）生！」
其實，係人都知你韓連山好撐另一參選者范國威，你驚佢搶阿范票咪照直講囉，講得咁「大義凜然」做咩啫？陳國強的支持者就留言鬧到韓連山狗血淋頭。「Lee Ka Fai Hilton」說：「你知什麼是民主嗎？每個人都有被選權，哦你們污染『泛民』就有，『本土』就冇？冇嘢呀？??票？×仲講呢D（啲），D（啲）（選）票簽咗約比（畀）你？......你們才是香港追求民主的唯一正宗代表？仲抱呢個心態？怪不得你們正在沒落？」
「Stephen Keung」也道：「姓韓嘅，你真係以為你哋話事，你哋玩哂（晒）？你哋班所謂『泛民主派』做過幾多好事心中有數，香港再俾你班×街搞落去仲得掂嘅？建制派固然可恨，『泛民』亦冇乜邊個係好人，絕大多數都係為一已（己）私利，班後生仔做得激進就割蓆（席）督灰，你班狗賊邊一忽似人？好似你哋有事就遊行香港就會有運行？幾十年都係得呢招，返屋企瞓啦！」
一次補選，咁多花生，提醒大家新年前就唔好食太多熱氣嘢啦！ ■香港文匯報記者 羅旦