■反對派發帖，話警方指要達1,000人才肯封馬路讓遊行者使用。 fb圖片反對派今時今日嘅政治能量薄弱到咩程度？就係搞個遊行除咗政團中人外，幾乎都冇市民響應囉。社民連、「人民力量」、工黨等多個政團噚日就因不滿新一份財政預算案而搞遊行，但咁多個組織加埋都係得「約200人」出席，市民反應冷淡。佢哋仲一度想霸埋條馬路，點知俾警方一句「夠1,000人先」霸氣KO。社民連曾經喺自己facebook到「吹雞」，但結果反而越等越少人，到下晝4點幾唯有宣佈解散，仲累到一兩個市民中伏𠻹。
一眾反對派中人趁噚日星期日搞遊行，由中環遮打花園行去金鐘政府總部，等到兩點零都係得200人左右，但都唯有照行。人雖然少，但反對派依然出盡辦法沿途玩嘢，連打小人都出埋，都咪話唔搞笑。
僅約200人 警拒絕封路
行到去添馬街與夏慤道之間，有遊行者就霸埋車路，企圖經夏慤道嘅行車路行去政總，但警方就話佢哋人少，要求佢哋行天橋，唔好影響其他道路使用者，最終拒絕封路。遊行者即場發爛渣，停止遊行、坐埋喺地下，警方就展示黃旗，警告遊行者嘅行為係違反法例，可能會被檢控。
社民連隨即喺facebook發帖，話警方「稱要達1,000人才肯封馬路讓遊行人士使用， 雙方依然對峙中，參與遊行的人士現正坐在添馬街上， 等待集夠1,000人讓警方開路。」
「人力」個譚得志亦口響喺fb出文話，等緊一眾反對派嘅立法會補選候選人加入，「今晚隨時通頂。」
結果係點？玩補選嘅人繼續造勢，遊行嗰邊就越等越少人，到下晝4點幾5點，社民連長毛（梁國雄）見到有一半人已經走埋，就唯有宣佈遊行結束，話鄭重向市民道歉，仲話社民連會承擔後果喎。
網民中伏：去到無晒人
佢哋真係好有承擔㗎，識得網上「吹雞」，但就冇交代返自己「吹雞」失敗。
疑似無辜中伏嘅網民「Andy Ng」就喺社民連個fb到留言話︰「我頭先去過政總，不過已經冇晒人。」譚得志嗰邊都有網民留言話「就快過黎（嚟），等等。」佢只好樣衰回應︰「已散。」 ■香港文匯報記者 甘瑜