■網民喺facebook群組出文，問大家：「其實范國威支唔支持派錢？」 fb圖片反對派中人成日講到自己幾咁聽市民意見咁，到同自己主張不同，咪又係唔理就算。唔少市民希望今年庫房水浸有錢派，但立法會新界東補選候選人咖喱飯（范國威）就擺到明話反對派錢。前日下晝財政預算案出咗，佢仲同一樣反對派錢嘅公民黨郭榮鏗一齊擺街站𠻹。有反對派網民就嬲佢根本唔為大家爭取，直言寧願投白票、投娥姐（另一候選人陳玉娥）都唔投佢。
公民黨同「專業議政」等反對派政黨及政團因唔支持派錢俾人鬧到爆，而佢哋力撐嘅咖喱飯唔止唔支持派錢，早幾日仲特登做網台節目，話要講派錢嘅「累退性質」咁話。
問吓都被當「打手」
網民「Jan Leung」喺預算案前一日已經喺facebook群組「大埔」度出文，問大家：「其實范國威支唔支持派錢？」呢個時候講呢啲，好敏感喎，即刻有疑似咖喱飯支持者出嚟解圍，「Ryan Yau」就反問︰「吓？決定支唔支持一位候選人係視乎佢支唔支持派錢？」
乜投票都有公式㗎咩？「Yves Lung」就反駁︰「好合理姐（啫），派錢都係民生議題。」「Sam Poon」就直線抽擊咖喱飯支持者︰「你唔係諗住見到『泛民』兩個字就支持呀？」
「Felix Wong」就試圖轉話題攻擊樓主話︰「又一名4號仔（另一候選人鄧家彪）打手！旁門左道！」樓主「Jan Leung」就頂佢唔順話︰「你做人有冇簡單咗啲？我問一句支唔支持派錢啫，咁又打手？咩民主呀？」「Raymond Yeung」就認為因為咁而唔想投咖喱飯好合理︰「票唔係老馮（奉）比（畀）。」
「大便味咖喱」難題 不如投白票
其他網民開始起哄，「Kong Wai Man」揶揄投咖喱飯好似係「咖喱味嘅屎同屎味咖喱飯」嘅抉擇咁；「Kenny Li」就話識投當然投娥姐；「Winson Wu」直言︰「唔支持派錢就一定全家都唔投佢！」感慨預算案乜都冇嘅「David Cheung」就話︰「今次真係得白票好投，揀唔落手。」
支唔支持派錢就見仁見智，但一言不合就唔投票想你執包袱，呢種作風同反對派向來做事都幾似吖。
同區候選人仲有趙佩玉、方國珊同黃成智。 ■香港文匯報記者 甘瑜