■范國威被網民恥笑衰到冇朋友。網上圖片咖喱飯（范國威）喺政圈冇朋友幾乎人人都知，但冇朋友到咩地步，先會有人特登整張圖出嚟恥笑佢同踩盡佢？噚日網上就有張相，大字寫住「范國威×到無朋友」，再加上「10.0無」、「No hope（冇希望）」咁嘅字，再數埋佢「無朋友」、「無良」、「無品」等「十無」，唔少網民都加入恥笑。
張相扮作《100毛》嘅封面，改為「10.0無」，力踩咖喱飯嘅「十無」，分別係「無朋友」，話佢獨裁又攬權；「無良」，批評佢無理炒助理，欠薪兼唔道歉；「無品」，寸佢批人哋「密室談判」，自己又見公安；「無良心」，因為佢鬧師父鄭家富，又唔畀長毛（梁國雄）參選；「無承擔」，揶揄佢一開始反「初選」，但有份玩又照參加；「無腰骨」，因為佢高調話撐同志，但選舉時又割席；「無吉士」，話佢口講反高鐵，但又搞高鐵團；「無義氣」，批佢開口叫人衝，有事自己鬆；「無規矩」，鬧佢申請泊車證嚟益朋友；「無誠信」，鬧佢冇口齒，事事自己行先。
數到咖喱飯「十無」，都真係對佢有啲認識，有人就質疑會唔會係鄭家富等人玩嘢。「Henry Yau」直言︰「范國威係（喺）『泛民』入面都無乜朋友啦。」有人就跳掣鬧《100毛》揀咗食屎唔揀咖喱，有網民就哭笑不得咁話，呢個係「10.0無」。 ■香港文匯報記者 甘瑜