「巴基之星」嘅幕後幾個月來可算絞盡腦汁，幫隻馬改善脾氣惡習，除馬主操心外，原來馬會總裁應家柏亦相當關心「巴基之星」，佢介紹一位馬語大師Monty Roberts俾馬主丁志強，替「巴基之星」解開心中結。
事後所知，呢隻馬上次罷跑，可能係雷神途中曾狠狠用鞭教訓過隻馬，所以隻馬就變得唔聽話，而試閘考驗亦曾試過玩嘢，後來得馬語大師諄諄善誘，終於獲得四次考閘合格上陣，而馬房亦替隻馬安排喺香港金盃二千米復出，當然，馬主丁志強好想雷神能夠再騎番隻馬上陣。不過，雷神事前答應咗「四季旺」馬主，因為「四季旺」贏完董事盃，雷神即答允下次跑馬王次關香港金盃時亦會同呢隻馬效力，所以推辭咗馬主好意，告東尼惟有搵愛徒蔡明紹披甲。呢仗香港金盃主角並非「巴基之星」，而喺新鮮出爐嘅香港盃冠軍「馬克羅斯」同大摩隻「明月千里」，不過身為告東尼倉副車「巴基之星」喺蔡明紹胯發揮起來一啲都唔失禮，最終跑入一席第四名，呢場頭馬「馬克羅斯」，贏馬時間破咗「雞尾酒」保持咗十幾年嘅紀錄，可以締出兩分鐘以下。其實跑二、三及四名馬，即「巴基之星」所締時間亦快，好似「巴基之星」咁，本身造出2.00.18，而呢個時間經已快過一級賽二千米標準時間，所以「巴基之星」雖非告東尼主攻手，但冇跑半年時間依然有咁嘅水準發揮，可見隻馬幾咁犀利。
今次日賽有場一班千六米，馬房立刻替隻馬報名，而雷神也答允再為「巴基之星」披甲，今次睇對手僅得六隻，全部都是次級馬，即使同場中有以往叱吒一時嘅千六米好手「美麗大師」列陣，但隻馬經已七歲之齡，相比起如日方中嘅「巴基之星」，呢場可以話係俾「巴基之星」回復贏馬雄心嘅良機。