今屆打吡大賽，有個數據不妨跟大家分亨吓，呢個就係年歲問題，大家當然認為四歲打吡一生一次呢個口號係正確嘅。其實並非完全啱得晒，因為喺呢十四隻正選馬中，有六隻係三歲零十一個月，不過用四捨五入計，佢哋都算合格，呢六隻未足秤馬分別係「中華盛世」、「喜裝寶」、「幸福分亨」、「陸寶」、「軍民歡」同埋「福將」。列出以上一批未足秤馬，完全係想話一個數據俾大家聽，從近五屆打吡冠軍馬中所得到資料，一定係足四歲馬贏晒，甚至乎年齡越大越好。二○一三冠軍「事事為王」四歲零一個月，二○一四年冠軍「威爾頓」四歲，二○一五年冠軍「戰利品」四歲零五個月，二○一六年冠軍「明月千里」四歲零五個月，上屆冠軍「佳龍駒」四歲零六個月。大家可以細心一看，近三屆冠軍，通常都是四歲零五個月或以上，如以呢個數據來分析，今屆只有三隻馬符合以上條件，呢三匹馬分別係四歲零五個月嘅「當家精選」，四歲零六個月「星洲司令」及四歲零六個月「佳騰駒」。從數據牌面睇，似乎呢三駒會有利今屆爭打吡大賽，不過話又得說回來，只要夠秤四歲馬便有贏面，好似「威爾頓」當年剛好四歲便奪得此項殊榮，今年預計一面倒嘅熱門馬「時時精綵」，剛好又係四歲，假如一切順利嘅話，料這匹季內贏過二千米嘅實力分子，仍是奪標呼聲最高嘅一駒。上述數據對馬迷來講，如何分析及理解，大家不妨用自己嘅角度去拆解。