有唔少馬主都好撐本地薑，不過有時本地薑都有唔爭氣嘅時候，好似梁家俊咁，雖為華將一哥，有啲馬主亦睇到佢肯搏肯拚嘅一面，所以專登支持佢，但冇成績交出嘅時候，最終亦係要求助過江龍。好似呢次跑第二場四班千二米隻「霸勝」咁。上季呢隻馬初出配韋達跑泥地千二米，第一次上陣經已有支持飛十倍，不過出閘起唔到步就玩完。今季幕後決定用梁家俊操刀，初出跑一千米直路賽，臨場七倍跟「新強勇駿」串Q，雖然贏唔到，但梁家俊依然受到幕後信任，認為一次半次之失可以原諒，下場增程跑田草千二米，即使面對「八十八十」及初出名氣馬「七十七十」，都係被捧成一匹第三熱門馬，獨贏只得4.6倍。幕後諗住可以本利歸還，點知「霸勝」表現強差人意，連位置都不保，事後檢討，兩個原因，第一個敗因初段鞍上人韁繩功夫留唔到隻馬，被「永旺喜喜」及「辣辣椒」燒咗頭段，拉士就轉弱，所以末段鬥衝唔夠「七十七十」及「肥仔」等馬，但仲可以捱番一席第五，輸兩個餘身位俾頭馬「肥仔」。另一個原因，可能係甩咗隻牙有關，根據賽後報告，話隻馬配鞍時有隻牙脫落，到咗閘前再經獸醫檢查，認為適宜上陣，雖然話適宜上陣，但對爭勝有冇影響呢個真係天曉得。梁家俊未能好好發揮隻「霸勝」，亦導致今次失去策騎權嘅原因，幕後立刻搵雷神幫手，雷神一聽到有實力馬送上門，當然應允。不過，由跑開闊場突然轉戰窄場，「霸勝」會否適應？其實呢隻馬季初到過跑馬地彈過課谷草千二米閘，走位4 4 2，末段自動撲上取得第二名，只輸一個頭俾該課大閘頭馬「放眼量」，大家由呢課谷閘見到，「霸勝」其實谷戰一樣合腳法，且留住衝仲勁，今次用到雷神出馬，相信會令呢隻馬有耳目一新嘅表現。