上周打吡大賽日，大贏家當然屬蔡約翰，以莫雅「平海福星」贏得今屆打吡，至於大摩、告東尼及苗禮德，雖然均有惡馬出戰打吡大賽，卻未能得償所願，當中告東尼馬房這日更是連場搏輸，不獨失落於打吡大賽，實力馬「時時精綵」僅得第三名，在當日的其他賽事場合，連賽前贏面甚高的「巴基之星」，亦只能取得一席第四名，確是令人失望。反而大摩喺普通場合尚有「勁揪」及「人民武士」建功，總算有兩場頭馬安慰獎。
今次夜賽告東尼部署強兵爭功，消息傳來「華美之寶」、「巴基小子」、「加州勇將」及「勇敢傳說」均有機會替馬房增添頭馬，喺周一下午，馬房安排這四駒先到機坪踱步，由領班監工，稍後更齊齊安排到亮相圈遊花園，以作提醒一下戰駒快要上陣。先講「巴基小子」，同主馬「巴基之星」上周輸到馬迷焦頭爛額，今次隻「巴基小子」雖然配上沈拿，但馬房經已做好備戰工夫，希望贏番場，等馬主攞番個安慰獎。其實，馬房落咗唔少心機喺「巴基小子」身上，大家只要睇睇呢隻馬在港所贏嘅係乜嘢路程，便知道告東尼幾有耐性，原來此駒三場頭馬全部出自谷草千二米，泥地雖經常上名，但從未贏過，而今季先後跑過十場，係未跑過贏馬路程谷草千二米，今次終於跑番勝途，用上沈拿呢位實而不華巴林冠軍，加上落番四班跑，應係去馬時候。
華美之寶皓楠搏盡
另一匹實力馬「華美之寶」，基本上跑谷草一哩係最正宗，今季經已屢次在這個路程取得成績，前後取得一贏三位，六十分馬其實可揀四班孭頂磅跑，但最近更索性用吳嘉晉披甲跑場三班谷草一哩，志在俾隻馬保持運動量，今次跑回四班賽對手減弱，即用回有磅可減黃皓楠，倉主有意用佢減五磅競跑，等呢隻馬屆時唔需要負重磅跑，呢個配搭先至係告東尼馬房打真波嘅組合。
加州勇將晉仔嫡系
「加州勇將」屬吳嘉晉嫡系馬，其實，呢隻腳患馬都幾夾吳嘉晉，近四仗跑谷草千二米得一冠一亞，唔係次次有入圍成績交出，多少同呢隻馬腳部問題有關。今次賽前有正常備戰，吳嘉晉下季有冇牌，呢類有機會贏取頭馬實力分子，喺吨滮W當然珍而重之，速度準繩馬，今次更獲得黃金一檔上陣，應該可以順利幫幕後贏馬，兼捧埋個香港交易所盃，並增加多少續牌機會。
勇敢傳說重振雄風
最後一隻就係轉入告東尼馬房初出嘅「勇敢傳說」，上手練馬師喺季初替匹馬贏谷草千二，能夠贏「問鼎高峰」及「理想回報」呢類谷中短途好手兩個幾馬位，點睇三班一定屬超級馬，不過，往後日子始終未能再贏，更連三甲都未跑入過，於是馬主近月才替愛駒轉投告東尼馬房，重點係東廄一向好少收轉倉馬，不過呢次破例肯收佢，證明倉主都認為呢隻馬一定有前景，馬房操練一排，用番最佳組合蔡明紹角逐贏馬路程，狀態已準備就緒，加上一個有利二檔，有望重振雄風。