■黄嘉樂快將40歲，希望事業有新改變。無綫男藝員黃嘉樂於無綫新劇《果欄中的江湖大嫂》一改以往靚仔形象，為配合他飾演的黑社會角色，所以特地留鬍鬚。說到現今不少TVB藝人離巢北上拍劇，早於2011年他也曾赴內地拍劇，之後回巢，嘉樂坦言人要有歷練才會想清楚很多東西。■採、攝：IvyChik
早於2001年，當時任職電訊公司的黃嘉樂去TVB檢查電話系統，而被邀加入TVB做演員。入行17年，憑天生Baby Face，黃嘉樂演出過60套劇集，有14次做人細佬，也做過多個現成為一線小生花旦的細佬。而去年在《心理追兇Mind Hunter》入面，他終於可以做一個有發揮空間的角色，演王君馨的老公，內心戲甚多。今次更大改形象，留鬍鬚演黑社會角色。
「襟老」變相咪「襟撈」
「我2003年加入第17期藝員訓練班。畢業後比起同班同學，如李霖恩、鄭世豪、何綺雲等，有較多機會，很快就可以有配角做，但公司畀我的角色，通通都係做人細佬，而且都係好乖，有些懦弱，有時角色性格都唔知點咁，即係無性格。以前其實相當抗拒自己生得年輕，局限了角色發揮。自己都快將40歲，比着以前，你仲叫我演細佬角色，我自己都感到尷尬。但現在我懂得利用這個優勢，生得後生，個人『襟老』變相咪『襟撈』咯。幸好近兩年，角色開始有轉變，像去年在《心理追兇Mind Hunter》入面，做王君馨的老公，有不少發揮空間的角色。今次在劇中留鬍鬚演社團大佬，本身想形象上出來man些，但一出來，就被李天翔比下去。佢氣場好勁，唔出聲，望一望你，就令人好驚。」
對閒言閒語一笑置之
2011年，黃嘉樂父親患了重病，他一半為了多賺錢幫父親醫病，一半想往外闖闖，就嘗試到內地發展。其實嘉樂在內地有不錯的人氣，在內地接拍古裝劇《媽祖》做了男一，更有不少劇本向他揮手，可惜遇上舊公司人事變動，令他錯失在內地站穩腳跟的機會。之後重返TVB，聽到不少閒言閒語，但嘉樂都一笑置之，只因在內地多個地方闖蕩之後，他發現還是TVB好。
「當時喺TVB一段長日子，剛好有人組公司向我招手，為賺錢幫父親醫病，就嘗試到內地發展。因為好多內地幕後人員，都有看我過往在TVB的劇集。初入新公司，係見到好好的前景，簽約不久就有內地劇組找我拍劇。記得當時見到份約，我都呆咗，一個劇有六位數人工，當時我仲盤算，如果一年3個劇都好好人工了。仲未計當時新公司承諾會開自家劇，咁應該有唔少工作啦。可惜好景不長，公司因人事變動，帶我入去的經理人走咗，新經理人打算用一線演員的價錢幫我接劇，咁當然冇人搵我啦，公司老闆又因為股票失利沒有開劇，自己呆等運到。喺內地做嘢確實搵到好多錢，但我都睇到好多人情冷暖。好多時如果有演員做得唔好，真係分分鐘下一組戲就唔見咗人，隨時沒飯開，真係純粹係搵到錢。自己亦錯失好多機會，因為有些劇組當時直接找我，我唔喜歡應酬，所以一心以為公司會幫我接，後來就浪費了機會。回到TVB，以前有些幕後見我唔出聲覺得我串，回來後仲會有單打說話畀我聽，但我沒有理會，學識咗點去易地而處，人要有歷練才會想清楚很多東西。現在同新經理人磨合了一段時間，大家開始了解雙方要求，我要求唔高，有TVB劇會先拍，如果有空檔亦畀機會我返內地拍劇。」
與女友同愛旅遊
黃嘉樂圈中的老友包括他口中的大哥鄭嘉穎、馬國明、唐詩詠，這些好兄弟姊妹，都是識於微時。今個農曆新年，各人更帶同另一半，新年團拜，十分sweet。說起做攝影師的女朋友，嘉樂表示拍拖將近一年，但已視為結婚對象，希望今年內或明年成事。初步希望旅行結婚，他大讚女友開朗又細心，更大爆女方已經跟自己媽媽相處得好好，一齊去旅行。
「我性格樂觀但唔係好識講嘢，所以好多人以為我好串。就算同嘉穎佢哋熟，我以前都怕主動聯絡他們，費事其他人覺得我想搲的咩啦。但現在人大了，心態唔同咗，現在我會主動在群組叫他們出來食飯，大家聚下。做人憑真心的很重要，正如我入行多年，出街有人認得，但卻未必叫得出名字，試過在街頭被人揶揄，『明咩星？二打六之嘛』、『做咗十幾年都係咁』以前聽到會覺得嬲，但現在卻只會覺得『𠵱家啲小朋友咁講嘢嘅』。咁我係未夠努力，未能令你記得我名，咁咪做好些囉。同現在呢個女朋友拍拖後，自己成個人開朗咗好多，她做婚禮攝影師，我們是在朋友間的聚會而認識，有共同的嗜好就是去旅遊，大家傾去玻利維亞傾到眉飛色舞。希望有機會同佢一齊經歷，佢有好多不同的旅遊經驗，令我們有好多共同的話題。記得拍拖初期，我們出街不拖手，佢問我係咪唔太鍾意佢？點解唔太拖佢？但其實是我覺得未穩定，唔想俾記者影到。現在拍了近一年，大家都有其結婚方向跨進，我媽咪都好鍾意佢，大家相處得好好。」