呢個禮拜重頭戲唔係十八區盃，而係出戰日本高松宮紀念賽嘅「有得威」，姚本輝在當地接受香港馬經傳媒訪問，佢話「有得威」一切適應得好好。嗰邊日本馬評家亦話「有得威」贏得，事關主隊嗰批短途馬都冇乜代表性，最大問題係呢一批馬年紀唔輕，所以未必夠「有得威」鬥。好似短馬錦標贏「有得威」嘅頭馬「彎刀赤駿」咁，經已七歲；三年前另一隻贏短途馬錦標嘅「瑞草祥龍」，現時已十歲，呢批過往叱咤一時短途好手，如今年華漸去。其實，上次「有得威」撼呢批日本短途馬，如果唔係排外檔，加上喺巫斯義胯下起步唔係咁敏捷，應該可以同冠軍馬「彎刀赤駿」爭一日長短，不過呢個係永遠冇答案嘅問題，只係可以講「有得威」跑好啲，三甲應該有份佔一席。
今次幕後專登搵番田泰安披甲，呢位仁兄今季成績唔錯，兼且年青力壯，可以話好氣好力，相信屆時必能將「有得威」跑到最好。講番日本班馬評家點解咁睇好「有得威」，佢哋指出「有得威」已有過喺日本中山馬場出賽經驗，因為，呢個馬場跑道普遍都係快地，跑千二米平均時間可以快香港一秒咁多，「有得威」上次喺呢條賽道跑得一席第五名，所締時間係一分七秒八，咁即係講，快地角逐呢隻馬一定冇問題，經過適應之後，比起一般日本代表演出更佳都未定。馬主今次對愛駒亦顯出信心，好早之前經已特登為呢次遠征訂製一批打氣風褸及Cap帽，屆時將會穿上在場為愛駒打氣，倉主又指出。雖然呢兩日見到「有得威」一切正常，但照顧呢隻馬嘅團隊，一啲都唔敢掉以輕心，早晚都有專人替隻馬量度體溫，畢竟日本係「有得威」生活時間較短暫嘅地方，身體每一個細微情況，馬房都要睇到實一實，而呢個禮拜大家不妨捧吓「有得威」場，希望佢能為港爭光。