「翩翩」周二本來要上機赴杜拜，但因未獲獸醫批准，最終冇上到飛機，稍後消息亦傳出呢隻馬將退出跑杜拜賽事。原來獸醫仄到隻馬前腳腫咗，要休息起碼一個月至可以復出。消息又指出，點解「翩翩」隻腳會腫咗，之唔係早前彈過課泥地大閘有關，蔡約翰今季好興將啲跑大賽馬，賽前仄一課大閘，然後至上陣，結果成績真係非常好，不過，「翩翩」就係因為咁嘅情況，最終都頂唔順而出現問題。馬主失望，香港馬迷失望，不過，最失望並唔係呢兩批人，而係杜利萊，話晒佢一把年紀，再有機會衝出香港跑一級賽機會真係唔多，今年有隻「翩翩」玩吓，點知都係唔成事，唔失望就假，現時惟有寄情於工作，希望多贏兩場本地賽頭馬補數。早排蔡約翰馬房幫杜利萊挽回唔少馬主信任，今次佢共獲七駒上陣，可以話係一個唔少坐騎嘅賽日，能有機會取勝者，最值得睇好係「皇仁大師」，因為呢系馬向來都非常關照杜利萊，而「皇仁大師」對上一次贏馬，經已要數係上季時候，正係由杜利萊操刀，以頸位挫「運財童子」贏馬。今季一開波第一仗跑泥地千二米，幕後即用杜利萊披甲，亦立刻拚入一席位置，不過呢席位置，卻令「皇仁大師」要上二班，一連坐咗四場馬監，最近兩仗先至重新降回三班上陣，至於升上二班所跑四場，幕後冇用杜利萊，只用其他騎師代勞，最近重返三班上陣，作戰狀態漸回復水準，安排跑泥地千二米，人馬有機會再振雄風。