■「你課金我補選」話︰「送畀我都唔睇啦！」 fb圖片你估咁啱大家都姓黃，啲飛就會好賣啲咩？藝人黃子華開棟篤笑，撳F5撳到爛都買唔到，但熱狗前頭目狗達（黃洋達）加開一場2,000人嘅棟篤笑，就連續做廣告都冇乜人理。唔少網民自己開post恥笑之外，有人仲走去狗達度留言寸佢︰「吓！你咁多fans，都係賣得兩千張咋！你要檢討吓哪（啦）。」狗達就叫對方買飛，仲抵唔住頸話︰「你都買飛嚟研討丫（吖），入場去數下人頭呀咁嘛，你地（哋）呢D（啲）人，最鍾意做呢D（啲）浪費人生嘅事。」咁又係嘅，好多網民都覺得，買飛入場睇，係有啲浪費人生。
狗達搞棟篤笑，本身已經係網民笑料，日前佢話加開一場，但網上就反應冷淡。佢就趁早兩日全世界都喺度搞黃子華棟篤笑嘅飛，借啲意咁問︰「大家係咪都買唔到棟篤笑嘅飛呀？我見呢度有喎，大家趁而（𠵱）家仲click到入去，快買飛啦！」
賣緊嘅當然係佢自己個表演啦，搞到網民「Joe Jason Mar」都忍唔住留言潤佢︰「亞視嚟嘅喂。」
自嘲「冇黃牛」 網民：因冇人睇
明明「萬人台」深夜播蜘蛛都大把人爭住睇，但狗達親自搞棟篤笑，竟然要出文自嘲「我嘅棟篤笑，就冇黃牛飛嘅問題」，網民「Kian Lui」就直言︰「因為都冇人想睇你囉。」
狗達就試圖反擊︰「係囉，賣得兩千張飛，只可以加開一場咁少。」
「Kian Lui」都唔弱︰「吓！你咁多fans，都係賣得兩千張咋！你要檢討吓哪（啦）。」狗達就扯火鬧人︰「開埋研討會，你都買飛嚟研討丫（吖），入場去數下人頭呀咁嘛，你地（哋）呢D（啲）人，最鍾意做呢D（啲）浪費人生嘅事。」結果係點？「Kian Lui」個名變咗灰色，再也看不到熱狗嘅post了。
被寸「一飛難求 冇人買冇人放」
其他網民點睇？成日追擊熱狗嘅「你課金我補選」就話︰「送畀我都唔睇啦！」「Albert Ng」仲寸︰「送就唔好喇，俾（畀）番（返）兩千蚊我就去睇。」
「Billy Chow」揶揄佢1,000蚊一張嘅飛話︰「貴過子華，佢以為自己邊個？」「陳明」再寸佢︰「×達九龍灣巡迴牛頭角玩晒！」
「JoJo Wu」就明搞事咁問︰「有無人知黃洋達棟篤笑嘅黃牛飛炒到咩價位？」「Simon Mak」配合回應︰「一飛難求。冇人買所以冇人放。」「Dickson Cheng」就話︰「黃牛表示︰呢啲飛掉落地狗都唔擔。」有啲人就實際啲嘅，「Sheri Lai」問︰「想知今次又有邊位金主包底派飛。」
■香港文匯報記者 甘瑜