近期運氣極佳嘅徐雨石，夜賽憑「好友益」及「靚紫荊」起個孖，「好友益」過往兩W俱為田草千四米，以往曾跑過谷草一哩，點知韌力未足而落敗，今次膽粗粗縮程跑千二米，誰不知今戰所遇對手弱得很，臨場即使李易達隻「雷霆導彈」被捧成一面倒熱門，但跑到最後百餘米已變成軟腳蟹，「好友益」憑有千四米韌力及衝刺，結果俾沈拿偷到雞，呢場頭馬可以話令幕後喜出望外。至於嗰場「靚紫荊」，賽前當然有信心摘下印遊會盃，但臨場田泰安嘅棄騎「放眼量」，轉手由沈拿披甲，開跑前突然瘋狂落飛，相反「靚紫荊」回到六倍成為半冷門，即係講呢場田泰安棄騎唔讓路，結果上演場大打真軍爭奪戰。沈拿「放眼量」轉彎入直路率先發力，田少點會俾你走甩，喺第三疊蝕位亦要加入發力行列，點知沿三疊發力嘅「靚紫荊」，直路用力過猛，有啲外閃，鞍上人側埋一邊身相就，終點前先至僅僅殺敗想起尾注嘅「放眼量」，呢兩場徐廄頭馬，如果冇運或騎者唔夠機智，真係要去廁所收錢。徐雨石贏咗呢個孖寶，昨日即掏腰包，買燒肉及雞返馬房還神，希望呢個運氣可以持續，繼續幫馬房數糊。今次馬房交俾貝湯美出戰嘅「藍天堡馬」，馬房手足傳來，上次出戰泥地一哩，由於韌力未能應付，所以戰敗而回，但並非狀態冇水準，今次縮回呢隻馬最拿手泥地千二米，貝湯美毛遂自荐要替呢隻馬效力，人馬鬥志俱好，又有機會替馬房增添頭馬。