上一次被馬會仄到賭馬嘅騎師係萬成，結果停賽之外仲要坐牢，近日熱烘烘嘅話題就係羅理雅被馬會罰停牌十五個月，事件亦係因賭馬被揭發，不過，這回要唔要坐牢，尚要等待馬會處理。由於事件嚴重，羅理雅夜賽坐騎全部換人，當中「傳奇」便由楊明綸冷手執個熱煎堆。而今周日嘅主席短途獎，「紅衣醒神」亦要易配，由祈普敦取得策騎權。
祈普敦都算係騎得嘅澳洲騎師，但際遇一般，季內雖然贏過大摩嘅馬，又為蔡約翰馬房立過汗馬功勞，但只要他們嘅殺手在陣，祈普敦莫講冇實力坐騎上陣，連多騎兩駒嘅機會也欠奉，今次得來千載難逢嘅機會，「紅衣醒神」結果找來祈普敦客串，只要交出成績，有機會靠這駒吐氣揚眉，也可以獲得蔡約翰嘅信任。「紅衣醒神」上仗跟「爭分奪秒」喺短途錦標二級賽交鋒，因為前駒贏過一級賽嘅關係，要讓「爭分奪秒」五磅，最終輸了一條馬頸，看羅理雅替「紅衣醒神」嘅跑法，末段三百米仍是按實韁繩，動也不動，要等嘅正係「爭分奪秒」，當見到「爭分奪秒」撲上來挑戰之際，羅理雅至開始騎，最後只輸一條頸位而回，賽後有網民狂鬧羅理雅，直指為何不一早發力希望走甩。其實，假如用這個戰術，即表現羅理雅心中已盤算「紅衣醒神」會輸俾「爭分奪秒」，這樣才會採偷雞跑法，希望走甩令對方追唔切。不過嗰仗羅理雅嘅戰術，在佢嘅心目中，擺明讓「爭分奪秒」五磅下，依然有信心在直路跟牠鬥後勁，輸了不打緊，證明羅理雅並沒有對「紅衣醒神」失去信心。今次跑國際一級賽，「紅衣醒神」與「爭分奪秒」平磅，即使鞍上人換上祈普敦，一樣係這項主席短途獎嘅擂台躉，正如「傳奇」一樣，只要催谷妥當，其他騎師一樣贏得，「紅衣醒神」今次大可報回一箭仇。