今個禮拜日賽事，名為冠軍賽馬日，將三項一級賽編埋同日舉行，並接受海外馬參戰，不過今年外隊僅得四駒出戰兩項錦標，阿聯酋一隻，其餘三駒均來自日本，睇頭不足，加上對手非強，所以較睇好主隊馬。冠軍一哩賽更無外隊馬參與，大部分人嘅目光會放喺「美麗傳承」身上，看過上次喺韋達胯下嘅表現，今仗會否交番贏香港一哩賽嘅威力，這是疑問，因為同場確實有唔少臥虎藏龍，準備一顯身手。其中有兩駒嘅幕後經已表明，假如佢哋嘅愛駒可以喺這項錦標有表現嘅話，下個目標便是六月份嘅日本安田紀念賽，這兩駒分別係「有得威」及「川河尊駒」。前者出戰高松宮無功而回，今次目標係安田，當然千六米嘅能力要喺今仗印證；另一匹贏過千六米嘅「川河尊駒」，因為目前評分仍未達到被邀之列，所以必需要贏這場一級賽至有機會被邀請。看今季「川河尊駒」嘅表現，可以用進步神速來形容，以往係贏谷草千二米，今季一開波亦係贏這個路程，但未幾增程到千四米，一樣能夠擊敗「當家精選」，最近一仗跑千六米，以一放到底贏馬。其實在此之前，「川河尊駒」已跑過一次千六米，取得第四名，但該仗所遇嘅對手係「四季旺」、「五十五十」及「明月千里」，能得第四名經已不俗，第二次跑千六米，可以氣走「平湖之星」係能力嘅表現，今次對手雖多，但以這駒越戰越勇，加上邀請麥維凱披甲，確實係有贏馬嘅本錢。