賽事去到第68期，馬季已進入尾聲，對賀賢嚟講亦是護級關鍵期，目前呢個倉口只得九場頭馬，仲欠七場至上岸。近期已見跟雷神加強合作，好似今次夜賽咁，賀賢三隻馬均強配，有貝湯美「活力寶駒」、潘頓「威武再現」，另外當然仲有雷神隻「冰糖葫蘆」（圖9號），雷神肯騎隻未出頭馬嘅「冰糖葫蘆」，大家不妨將出擊重心放喺呢隻馬身上。賀賢搵得雷神幫手，顯然有所寄望，呢隻「冰糖葫蘆」上仗由潘頓騎出戰谷草一哩，點知表現麻麻哋，不過隻馬之前配潘明輝出戰泥地一哩，三戰得兩亞一季，泥地一哩顯然有相當戰鬥能力，不過，潘明輝卻未能替呢隻馬帶來頭馬，而上次潘頓所跑只係一場谷草一哩賽，咁即係講，未見「冰糖葫蘆」用到最強配搭跑較合腳法路程。
今次「冰糖葫蘆」配雷神跑回泥地賽，但所跑並非泥地一哩，卻是泥地千二米，咁即係點睇呢隻馬機會。其實，以賀賢如今處境，贏得一場得一場，無理由亂咁替旗下馬匹報賽程，上次用潘頓跑谷草一哩，可能因為當時冇適合泥地賽程供呢隻馬上陣，所以焗跑，呢次夜賽卻並非如此。大家細心睇吓三班賽有兩個路程可以角逐，一個係千二米，另一個正係一哩，賀賢一哩嗰場並無馬報名，所以「冰糖葫蘆」屬專登揀跑呢場短途泥地賽，再睇，同場之中，雷神上次騎開隻「精英寶貝」，一隻咁犀利泥地千二米嘅馬，竟然雷神都唔騎，俾番潘頓上陣，所以今次「冰糖葫蘆」是有絕佳取勝機會。當然，大家都知呢隻「冰糖葫蘆」跑開泥地一哩會較有信心，但擅跑泥地馬，性能可以由一哩縮落千二米，亦有本事可由千二米伸展到一哩，一切只視乎鞍上人如何控制步速，今次雷神肯拍心口替呢隻馬披甲，相信必有爭勝決心，賀賢今次夜賽大有機會增添頭馬進帳。