對於告達理馬房嚟講，今季要取得合格頭馬數字相當難，除非有奇蹟出現，不過，呢位練馬師依然敬業樂業，經常親自替馬匹踱步打磨。有啲喜鋤強扶弱嘅馬主，其實亦對這位倉主作出支持，如「餘皇」呢匹團體馬，當中有些成員屬「大地和平」、「喜菜」及「搖錢樹」等團體馬成員，佢哋將隻「餘皇」加盟告廄，練馬師得到支持，當然非常重視呢匹質新分子。最近一仗谷草千二米，呢隻四歲英國馬終有上名成績交出，只不敵「百步穿雲」及「友情人」。從呢場谷草千二米嘅表現所見，只要「餘皇」再進步，相信三班隨時贏得，而上周三夜賽，三班編有兩場短途賽，一場係一千米，另一場係千二米，呢兩個路程對「餘皇」來講都適合發揮，但馬房卻安排隻馬轉戰泥地千二米，初跑泥地千二米，告達理顯然經過一番思量才部署。事關「餘皇」在港五戰，無一場是跑泥地賽，不過，大家可翻查外地賽績，隻馬曾經跑過兩次膠沙地，路程俱為一千米，結果得一冠一亞，由此證明呢隻馬非常擅爭泥地。所以，大家咪以為隻馬冇試過泥閘，就唔相信識跑泥地。馬房今次依然將隻馬交俾騎過三次嘅蔡明紹上陣，因為呢隻馬由佢一手一腳操好兼跑開，包括上次入位，乜嘢性能鞍上人經已摸通得七七八八。呢位本地薑近期少咗師父告東尼個倉嘅支持，要多贏兩場頭馬，就係要靠外線坐騎，所以呢隻「餘皇」，一見操好列陣，唔使諗一於追到隻馬贏為止。