江欣燕（欣欣）在《逆緣》戲份不少，飾演黎耀祥太太，戲份貫穿全劇，劇中飾演賢妻良母，有個兒子。拍此劇時，欣欣與祥仔的恩愛家庭戲，參考了以往自己的婚姻生活。和前夫吳積遜離婚5年，欣欣不急於搵第二春，只因自己公私兩忙。欣欣之前原本準備舉行演唱會，但因爸爸去世而暫停，欣欣希望明年可以開個人演唱會。■採、攝：植毅儀
娛樂圈時興「美魔女」，接近50歲的江欣燕保養得宜，欣欣自言做人心境很緊要，再配合食療，就相得益彰。閒時，欣欣愛研究煮食，最愛煮海參，12人分量的美食，完全沒難度，如果下次TVB再開飲食節目，不妨考慮欣欣。
「我好熱愛生命、愛自己的方法，閒時就去玩，剛去完滑雪回香港。要保持一顆少女的心，如果唔係，我點可以在花下幫你擺咁少女的甫士影相？唔好成日畀年齡數字去影響自己，同埋注意飲食。爸爸2年前去世，開始注重自己及家人飲食。上年5月開始進行生酮飲食法，不食澱粉質、糖（包括生果），只可以食牛油果、檸檬。這個diet可以進食高脂肪，因為身體需要消耗脂肪來維持運作，便將我平時收埋在腳、大髀、大髀罅的肥膏全都減掉。我好喜愛煮嘢食，中、西都有研究，農曆新年間，親戚來我家食飯，12人一圍菜，對我沒困難。如果TVB搵人教煮餸，可以搵我開『欣欣廚房』。」
盼明年成功開唱
曾4次跟黎耀祥合作，欣欣與祥仔真是識於微時。當年《娛樂插班生》、《樂壇插班生》中，二人分別扮梅組及羅文，維肖維妙。5年前，欣欣同前夫吳積遜離婚，結束12年的夫妻關係，單身5年，欣欣笑言不想從一個墳墓，走進另一個墳墓，所以未有再婚打算，寧願花時間準備開個人演唱會。
「之前爸爸去世，前夫都有去靈堂，大家再見亦是朋友。一個人有一個人的好，我很享受回復單身的生活，感覺如『重生』。閒時可以約好多好姊妹去玩，現在搬回去老家同媽媽住，令我與媽媽更親近，我會帶她一起開工拍劇、睇首映、到內地登台剪綵，想她加入我的世界，不會介意人家說我可能因為很孤獨才經常黐住阿媽，反而是到我這年紀仍有媽媽陪在身邊，真的要好好珍惜。之前有人搵我搞個人演唱會，本來所有事都傾好了，但因為爸爸忽然去世，真係冇心情去搞，睇下嚟緊會再傾返，希望明年成事，可以開自己的個人演唱會。」