■警方昨晚大陣仗部署，派出軍裝及便衣警員監察，更派員攝錄實況。 香港文匯報記者彭子文 攝「以死相搏」變揸咪嗌口號 圍觀者記者多過參與者
香港文匯報訊（記者 陳庭佳）喺旺角暴亂核心人物之一、「本土民主前線」前發言人梁天琦被判罪成之後，一個叫做「學生獨立聯盟」嘅組織就吹雞叫人噚晚落西洋菜南街，嚟一次「大規模社會抗爭計劃嘅預告」，仲講到「以死相搏」，搞到警方非常緊張，傍晚已經派咗大批軍裝便裝落去睇到實，點知壇嘢點睇都似係一場記招，圍觀者不過50人。現場記者同路人喺核心外圍圍觀，一班核心內圍嘅「港獨」分子逐個揸咪講嘢，哦，明晒，又係講就威做就雞嗰亭！
話說警方傍晚6點左右已經做晒準備，派咗幾隊藍帽子同便裝落去菜街戒備，去到7點咁上下仲增加人手，同埋喺大廈天台用攝影機影落嚟，但係「學獨聯」、「學生動源」同幾個大學學生會啲人加埋都唔夠佢哋多。
去到8點左右，「學獨聯」都只係喺個台上面播吓旺暴片段同叫吓「香港獨立」、「以死相搏」口號咁。
警察記者重重「包圍」
之後嘅情況就同一般組織喺菜街搞論壇搞記招無分別，最內圍就有召集人陳家駒、「金金」梁金成、中大學生會會長區倬僖、理大學生會會長林穎恒等人輪流播「獨」，中間嗰層就係記者同旁觀者，外層就係路人同警方，隔籬班「歌手」仲大聲過佢哋。去到9點幾，集會就和平結束嘞。
網民寸堅係「一」夫當關
由「以死相搏」去到「和平結束」嘅落差真係好大，網民就唔係好接受到，好似「Kwokho Ng」就話：「 吓，結束咗！又話以死相搏？」
「Lee Cheung」亦都好抵死咁講：「原來係一夫當關萬夫莫敵，初時我以為有500個，後來諗諗吓最多都係50個，到咗今日我相信最多都係得5個，??家親眼見到原來真係一夫當關萬夫莫敵。」
撐「獨」組織「星火同盟」今日亦會喺金鐘夏愨道「連儂牆」舉行集會，現場會有心意卡，話要「讓被捕者知道港人的支持」，並預計會有約200人出席。一班「獨」人，包括黃之鋒、曾健超、梁頌恆、周竪峰、劉頴匡、陳澤滔、鍾翰林、王百羽等，同埋「港獨」組織「本土民主前線」、「青年新政」、「勇武前綫」、「香港民族陣綫」、「光復最前線」都分享咗，黃之鋒更聲稱話會出席。
不過，網民反應就唔多理想。「Chiu Kai Wong」就質問：「示弱？消費抗爭者？」「Ka Lok Chan」就揶揄：「集會示弱，夠鍾（鐘）散水，劫獄啦笨！」「Ching Wong」也道：「係囉，點解無人劫獄嘅？人呢？人呢？去左（咗）建國牙（呀）？」
「星火」欲效加場籌旗
唔少人仲覺得佢哋只係為咗錢。「Wong CF」就簡單直接：「又來呃錢？」「Hiu Nam Chow」就話：「心意咭（卡）？籌款箱多D（啲），醉翁之意只在錢，龜縮達（黃洋達）又用同一手法，窮途末路。呃錢駛（使）。」「Mokwan Chung」道：「籌款同盟就有你地（哋）份！」
「Qua Bona」就曲道：「心意咭（卡）有鬼月（用）咩，安家費最實際，現金、港幣！」「Philip Wong」則揶揄：「台仰義士千金歸來！」「Ulysses Chan」稱：「去睇馬騮戲，捐錢啦港豬！」