小麗老千（劉小麗）在參加立法會選舉時，聲稱當選後會捐出一半人工，在九龍西區內成立長者義工隊，結果走數，喺網民追數下捐啲唔捐啲，「義工隊」更加冇咗影。在昨日記者會，小麗老千宣佈撤回上訴，迫政府啟動補選程序，口中雖冇直接話選，但佢話唔選都冇人信啦！此前一直追老千數嘅「無敵神駒」仇思達，就即時發帖要小麗老千交代佢之前到底捐咗幾多錢。
曾承諾當選捐半糧
「神駒」昨日發帖道：「倘若劉小麗有意參加九龍西補選，必須先兌現其選舉承諾，即捐出2016年10月至2017年6月期間，共9個月的一半立法會人工，並提供單據給公眾查閱。敬請大家廣傳，謝謝！」
此前，浸會大學宗教及哲學系高級講師陳士齊就同小麗做網台節目，喺鏡頭前係咁意攞兩張疑似收據嘅紙揚兩揚就話已經捐咗錢，仲話會不日喺fb上載收據張相畀大家睇，鬧「神駒」等人收咗錢搞事，但所謂「上載收據」到現在都係走咗數。「神駒」就揶揄：「劉小麗好害怕被人追數，上次我一提出，牠（她）就找陳士齊屈我『收共產黨錢』，不知道這次牠（她）又想屈我乜嘢！」
除咗捐人工，反對派最初為「瀆誓四丑」成立所謂「守護公義基金」，籌款畀四丑打官司，結果姚松炎為參加補選冇繼續上訴，現在到小麗老千、羅三七（羅冠聰）都話唔上訴，咁筆錢去咗邊？
「DQ基金」剩巨款冇回頭
身為「守護公義基金」發言人的鄭宇碩就喺小麗個記者會上話，基金目前籌集了1,140多萬元捐款，花費了450萬元，主要用於初審費用、對方的律師費、長毛上訴案的按金、街站與年宵攤位開支。咁剩返嗰579萬元呢？梗係唔會回水啦，鄭宇碩話要用於未來包括「佔中三丑」戴耀廷、陳健民、朱耀明嘅9人案嘅法律開支喎。
「神駒」就話：「當初劉小麗以『守護公義基金』名義向市民募捐，宣稱要就『DQ案』上訴，如今卻出爾反爾，撤回上訴，僅剩下長毛賊以法援上訴。......請鄭宇碩回答：一、自2017年9月8日至今，「守護公義基金」共籌集了幾多款項？二、自劉小麗提出上訴至撤回上訴期間，共浪費了幾多「守護公義基金」資源？」
一直係「港獨」支持者嘅「屍永青」亦喺fb發帖，問：「小麗老×唔再訴訟係咪會退錢畀啲善長呢？」網民「Linus Wong」看破世情：「俗語話齋 : 財到光棍手，一去冇回頭。」「Ken Yeung」則揶揄道：「有名你叫小麗老千......」
■香港文匯報記者 陳川