「熱狗」越做越縮，近日其「前首領」狗達（黃洋達）喺九龍灣國際展貿中心搞「棟篤笑」，貴嘅飛要成千蚊，500蚊飛仲話賣晒。一直同佢有仇嘅「無敵神駒」仇思達就喺fb上載大前晚首場嘅場內拍攝照片，相中只見到唔少空櫈，成班「益友」即刻圍爐恥笑，又鬧佢篤數。狗達老婆殘獸胃（陳秀慧）就抵唔住頸發帖，鬧「神駒」淨識打嘴炮係中二病嘅巔峰。「神駒」就挑機叫佢貼張前晚大合照嚟睇睇，開嚟見吓有幾多人喎！
假期睇吓網絡花生有時都幾好笑。致力搵銀去旅行嘅狗達搞「棟篤笑」，大前晚搞第一場，「神駒」就發相玩踢爆，話現場前排一大堆空櫈，梗係又玩篤數咁話。佢成班「益友」梗係瘋狂恥笑狗達啦。
「陳秀珠」就「大讚」：「好體貼啊！一個觀眾，有幾個位擺袋；睇得悶得制（滯），仲可以訓（瞓）陣！」「陳麒麟」亦話：「好多關愛座，無人坐，人間有愛。」
「Ning Chak」揶揄：「其實無錢請臨記就唔好搞啦。」「Spi Da」則話：「坐喺度嗰d（啲），未必係自己買飛嚟睇，更加未必係觀眾！」
「Timmy Ma」更出有聲post：「獨望着空櫈心難過，為何想講的從前不說清楚......」「Roddick Cheung」就估計：「開完又差唔多到時候緊急籌旗，渡過難關。」
「益友」嘲如神功戲
「蔡曦瑤」就「唔同意」：「竟然有人去果（嗰）下（吓）先驚！」「Charles Chung」亦曲道：「神功戲未睇過呀，坐滿晒架（㗎）啦，個腦大D（啲）得唔得呀！」「Jerry Tam」也玩埋一份：「明明好似神功戲咁樣要特登唔坐滿架（㗎），大家識條×咩，又係到反熱。」
殘獸胃就引用自己友「血汗辦公室」fb專頁個post，話「神駒」張相係剛剛入場時影，「8:30pm開show差不多90%full（滿）......你仇狗連錢也不比（畀），求其找張相出來亂噏野（嘢），無品！」
殘獸胃就話「神駒」係「賭馬上網打嘴炮中二病既（嘅）顛（巔）峰」：「咁叻你又租個場搞兩場，然後又搵咁多人睇囉。」
殘獸反譏中二病
最好笑係啲「熱狗」喺殘獸胃fb嘅留言。「Patrick Wu」話：「其實我知人有來唔到D（啲）飛又送唔出，即是飛賣咗，只係無出席。」
「William Chim」也幫口話：「即使見到有空位都不等於無人買飛，我買了兩張$500飛，但昨（前）天臨時有緊要事又趕不及給其他人睇，才會有空位出現。」
「神駒」就即刻挑機：「熱狗大媽殘獸胃幾時先會抵唔住頸貼大合照？快×啲貼出嚟，等我地（哋）點人數啦！」「梁耀銘」也幫口道：「×！咩未入晒場啫？有本事影張『全院滿座』，好×過打嘴炮！」
睇返「熱狗」前晚「報道」狗達「棟篤笑」嘅現場相同片，又真係唔見有影過觀眾席有幾多人噃。
唔緊要啦，加開咗一場㗎嘛，到時記得自己影返張場面相，大家咪唔使拗囉！
■香港文匯報記者 陳川