有時候呢，要批評政府政策唔係唔得，但如果連身為立法會議員嘅，都淨係識玩埋啲小學雞嘢嚟博上鏡，真係叫每月出成10萬糧畀你嘅納稅人情何以堪呢？公民黨立法會議員陳淑莊，近日喺運房局局長陳帆喺立法會見記者時，竟然匿埋喺條柱後面扮記者大聲「發問」。呢種行為有冇妨礙記者採訪呢點都唔講嘞，但睇佢笑嘻嘻嗰副幼稚園嘴臉，正事唔做走去扮「柱女」，相信大家都會覺得自己嘅稅交得「好抵」（曲）。
匿柱後鬼祟「發問」
做得議員，唔滿意某項政策，可以喺議會直接質詢官員，可以約見，可以用佢份議員實報實銷津貼搞記者會搞簽名搞遊行示威等等，做咩要玩埋呢啲小學雞嘢呢？電影兼舞台劇導演高志森就睇唔過眼，轉發咗網民嘅帖子，形容陳淑莊係「十幾萬月薪嘅『柱女』」。
內文話：「運房局局長陳帆立法會會議後見記者，而其中一名『記者』竟然是公民黨立法會議員陳淑莊！她混雜在記者群之中，蹲身在柱後扮記者大聲提問，但陳帆只是回應了記者幾條問題便離開，陳淑莊鬼鼠（祟）扮柱女『搶Q』失敗。超樣衰！」
唔少網民留言剷爆陳淑莊。「Dora Yau」就話：「你直接指使（友好）記者問咪得囉，使乜喺度扮柱女啫！」「羅亞雄」嘆道：「簡直係小學雞本色，大佬，你收成十萬月薪，做D（啲）咁低（智）嘅嘢，真系（係）......唉！」「Joey Chou」也道：「仲要俾人圖文並茂影埋相，真係弱智到不得了！」
「Toto Milky」則戥所有納稅人唔抵：「每月十多萬就係養著（着）這一類廢人在議會內......」「李利平」慨嘆：「HK無人才嗎？要甘（咁）樣素質嘅人入立法會，悲哀！」「Angel Ho」就揶揄：「小鬼難登大雅之堂，紙紥（紮）公仔都係企（返）去靈堂好啲。
■香港文匯報記者 陳川
