■自稱「當區」區議員嘅余德寶，話今日會搞個「模擬規管」，證明通過「發牌制度」，可以解決噪音問題喎。 fb截圖油尖旺區區議會終在民意支持下，通過取消旺角西洋菜南街行人專用區嘅建議，以解決街頭表演者造成嘅嚴重噪音問題，居民當然額手稱慶啦，但一向堅離地嘅公民黨似乎冇理過當區居民嘅感受，公民黨繼反對「殺街」動議後，今日仲要同「幾個」街頭表演者喺行人專用區進行「模擬規管」，去證明政府通過發牌係work咁話。當區居民鬧爆公民黨唔衰唔做，更回帶話佢哋反對預算案派錢堅離地，又話佢哋咁鍾意「藝術」，不如索性叫班街頭表演者去佢哋選區或者屋企樓下日嘈夜嘈睇吓點？有人仲話要佢哋與民為敵，終須票債票償。
■香港文匯報記者 陳川
英諺有所謂「not in my backyard」，作為藍血黨，可能覺得打出「藝術」兩個字，好似人都高貴啲咁，所以選區唔喺九龍西油尖旺，而係喺九龍東嘅公民黨立法會議員譚文豪，同埋自稱「當區」、但其實佢選區喺富柏，即海富苑、櫻桃街嗰邊嘅區議員余德寶，就話今日會喺嗰度搞個「模擬規管」，證明通過「發牌制度」，可以解決噪音問題喎。
保育「藝術」為名 抽水攞彩為實
佢哋介紹，是次模擬規管街頭表演會喺當日下午5時至8時，在近家樂坊一帶的行人專用區進行，設有3個「表演圈」，並設「緩衝地帶」避免聲浪互相干擾，還會設定街道及聲浪限制云云。譚文豪仲話，如果模擬規管「成功」，佢會喺立法會層面爭取政府推行有關規管咁話。
困擾多年嘅噪音、滋擾、阻街問題終於有望解決，公民黨突然出嚟攞光環，就算政府最終唔接受佢哋嘅方案，恐怕糾纏間就算最終真係「廢街」，都起碼要遲多幾年。居民當然即刻着火，唔係居民嘅都狠批公民黨堅離地。就連本來屬於同溫層嘅譚余兩人的fb、《蘋果日報》即時新聞嘅留言區，絕大多數人都係鬧爆公民黨。
fb留言招負評 「攬街」與民為敵
「Man Malteser」就話規管根本唔work：「自己唔自律，唔係今時今日話取消架（㗎）啦，都唔醒目，仲要變本加厲， 去到要取消喇，先至話比（畀）人知識得自律，算吧啦！」
「Jon C F Chong」更「一字一淚」：「旺角菜街幾多唐樓，幾多劏房，工作完或放假想休息下（吓）都唔得，唔起（喺）你屋企門口表演就講到香港人須（需）要依（呢）條街，試下（吓喺）你屋企門口嘈，你支持我切呀！你認為管制有用？幾年前殺凈（淨）兩日，害到個（嗰）兩日更嘈！」
他們並批評公民黨所謂「劃區」根本多此一舉。「Nicky Wong」苦口婆心咁話：「而（𠵱）家唔係表演，係擾民同噪音，成件事根本整變左（咗）質，分類只會衍生另一個問題， 何必再苦苦糾纏呢？」「Chris Lam」也擔心劃區會更增爭拗：「分類可能仲嚴重！到時為爭位大打出手都有可能！」
被回帶挖「罪行」 「終須票債票償」
「Man Cheung」也批評：「攪（搞）乜×吖，多×魚。居民會話，你做乜×嘈（噪）音畫（劃）係（喺）我個區？」「James Weng」就直截了當：「而（𠵱）家係嘈呀。分區就會唔嘈，就等如（於）話將D（啲）屎分區就唔臭一樣，冇×腦。」
不過，最多人批評公民黨無視居民苦況，離地到震，仲話佢哋咁珍惜呢啲「藝術」，不如就喺旺角住一排，或者叫班街頭表演者去佢哋選區甚至屋企樓下表演，讓他們感受一下，特別是選區在旺角另一邊、選區居民不受「藝術」噪音影響的余德寶，「咁叫班大媽大叔轉場去海富苑開檔囉！」
有人就考古返公民黨各創辦人當年都係支持港人內地子女可以即時來港行使居留權嘅往事，鬧佢哋係造成今日新來港人士「太多」的罪魁，有人則回帶話公民黨反對今年財政預算案派錢，係不理民間疾苦、與民為敵。總之就係一句，佢哋唔會再投票俾（畀）公民黨，要佢票債票償，選舉時點告急都冇用喎。
