所謂「叫人衝，自己鬆」、「講就兇狠，做就毓民」，成班「獨」派中人喺網上就「悲憤莫名」，實際係想繼續煽人衝以滿足其春秋大夢。喺一個網上討論區，有人就聲稱「既然擲磚都判7年，點解唔擲汽油彈」，即刻俾網民揶揄「點解你唔做」，並鬧爆佢又想煽人去死。
在「連登討論區」，網民「惟見古時丘」在梁天琦被判囚6年後發文稱：「此後既（嘅）『抗爭』會更加可怕，因為『抗爭者』知道，當佢地（哋）踏前一步，就無路可退。擲磚同擲汽油彈其實再無輕重之分，咁點解唔擲後者？『抗爭者』會知道，一係就推翻政府，一係就人生終結、香港滅亡。」
「HKVDC_2017」亦附和道：「根本一開始就應直接終結『殖民政府』，而唔係零零星星既（嘅）示威，同旺角維護小販權利香港文化呢D（啲）行動， 可以直接跳去最終行動。」屬於「鍵盤戰士」嘅「港獨」組織「光復最前線」亦想推人去死，喺fb專頁轉發咗呢個討論。
網民寸「點解你唔帶頭」
不過，大多數網民都睇穿你班「鍵盤戰士」籠嘢。「天溢」就留言「附和」：「係囉，咁點解你唔做？」「戴資穎」就質問：「樓主你帶頭擲？」「頂到上心口」亦話：「你做囉，做乜唔做？有（又）煽動其他人做？」「油雞滷味樣樣都要」亦寸佢：「講就凶（兇）狠。」
「哥哥不痕了」也批評：「講你就叻，推波助瀾咪你呢類。汽油彈最高可判終身。」「放工男」更「爆料」：「我好多同學見到樓主個PO，都話覺得有興趣。叫極佢地（哋）都唔理......仲話要夾埋CC台班巴打搞事，希望佢地（哋）唔係真係搞事啦......點解樓主你要出埋呢D（啲） PO 叫人做呢D（啲）野（嘢）呀？」
見可能出事，「惟見古時丘」即刻戴頭盔話佢「不支持任何犯法行為，並不鼓勵任何犯法行為......提出呢個問題係想指出，今次判決影響深遠，縱觀以往歷史，所有既（嘅）『打壓』只會令到『抗爭』更加激進、更加暴力」喎。
不過，有網民就話已經報警囉。「USTGbus2017」寸佢：「唔洗（使）戴頭盔啦，準備入去坐啦！」 ■香港文匯報記者 陳川