恭喜恭喜，二十四歲的澳洲騎師祈普敦（圖黃色綵衣），日前在網上社交平台透露，他將會於香港馬季煞科之後，便立即返回祖家悉尼舉行婚禮，迎娶未婚妻Morgan，正式成家立室。
祈普敦上季來港發展，未婚妻Morgan跟在身邊，並在港打工，不過Morgan今季就多咗時間留在澳洲，可能因為難忍分隔兩地相思之苦，祈普敦終於下定決心，同Morgan拉埋天窗，幫未婚妻封盤。祈普敦嘅婚禮將會在七月二十二日舉行，騎者透露好友麥維凱亦係兄弟之一。完成婚禮之後，祈普敦就會同Morgan飛往美國拉斯維加斯度蜜月，下季祈普敦任首半季公司騎師，Morgan將會來港陪伴左右。
另外，冠軍級騎師莫雷拉下季撤退香港，改去日本馬圈發展，貝湯美也宣布下季返老家澳洲，杜利萊與柏寶兩人於牌委會下季陣容榜上無名，究竟是不獲發牌，還是有更好出路發展呢？
杜利萊、柏寶在港十幾年，拿了三粒星身分證，唔通年逾四十，返法國及澳洲由零開始？早前曾有馬主聯絡二人，答案不置可否，也毋須追問，但仍交代一句，杜利萊表示未有去向，只求如常逍遙自在，反而柏寶之言有點出乎意料，他表示馬季結束後，短期內需要休息，打算暫別鞍上生涯，據知去年他私生活出現了變化，早陣子缺陣一天來個清楚了斷，心態疲憊極需要時間復元，上述四位猛將拒絕再玩但有得揀，也在此祝願各人未來有更佳發展。