好多人話蔡約翰季尾半收工狀態，影響雷神攞冠軍，呢個現象係咪咁，真係唔知，好似呢次日賽咁，蔡廄安排唔少實力馬列陣，當中如五戰五捷不敗之師「以奇用兵」又再列陣，鞍上人亦係雷神，呢類馬匹，發揮正常相信可以替雷神取得頭馬。蔡約翰雖然一向支持雷神，不過，近期有唔少出擊馬，已非再倚靠雷神出擊，原因之一，因為公司騎師條例關係，一位公司騎師唔可以太集中騎某個單一倉口馬，只要百分比一接近，便要停一停，馬房須換其他公司騎師披甲。事實，大家有無發覺，季內有唔少蔡約翰實力馬都交由杜利萊出擊，「翩翩」實力咁強嘅短途馬，一樣交俾佢跑，所以到呢個時候，蔡廄並非每隻實力馬都會交俾雷神出擊。大家睇番今次日賽，蔡約翰九成實力馬都支持雷神，但喺第三場精英碟千八米三級賽，蔡約翰雙龍出海，分別以「達羅素」及「哈蝦巴爸」列陣，大家睇一睇，同場之中雷神揀隻「醒目名駒」騎，呢隻馬大家都知道係三隻告東尼參戰馬中實力最弱嘅一駒，即使由雷神跑，大家都知冇冠軍相，相反，蔡約翰呢對馬季內成績標青，尤其「達羅素」季內三捷，其中兩場更係打疊連續兩日賽期取勝。大家不妨睇睇「達羅素」今季所贏三場頭馬嘅表現，最先一場由莫雷拉贏，後由黃皓楠減磅取得連捷，四日後跑場三級賽百週年紀念銀瓶，交番俾莫雷拉取勝，基本上呢隻馬贏得嘅時候，可以強配雷神跑，但亦可以用黃皓楠，視乎蔡約翰點調兵遣將，呢次用祈普敦，似乎又想出奇制勝，大家睇睇，其實「達羅素」今季首戰，馬房經已用過祈普敦搏殺，但嗰場只跑第二名，結果冇咗隻馬策騎權。而祈普敦曾經替蔡約翰做過好多幕後工夫，所以今次蔡約翰一對實力馬交晒俾佢揀，「達羅素」分分鐘係真命天子。