「錶之寶寶」與「錶之太陽」一對同家族馬，兩駒均與祈普敦有關，後者初出配祈普敦即爆十八倍冷門開齋，再出只得第二名，輸俾大熱門馬「妙算達人」，祈普敦依然好努力替隻馬保住一席Q腳，不過呢場拚失就喪失咗策騎權，上仗再出跑千四米，鞍上人經已換上潘頓，結果順利補中。其實，前次「錶之太陽」喺千二米搏失，本身並非短途馬，來港前最後贏馬路程屬一三五○米，季內一出可喺千二米爆冷，純跑多少新鮮感。「錶之」系馬以往常用潘頓搏殺，如已退役「錶之勝」及現役嘅「錶之星」，首場勝仗均由潘頓操刀，至於「錶之太陽」，只係潘頓睇漏眼，俾祈普敦執死雞成功，「錶之太陽」回歸潘頓手上，相信要俾番祈普敦，真係有排等，即使等到亦未必好，到時評分及狀態都唔會好似現今咁，有本錢話贏就贏。好彩潘頓隻手仲未長到可以插晒咁多個馬房，與「錶之太陽」息息相關嘅「錶之寶寶」，現時養喺羅富全馬房，初出用潘頓跑，成績麻麻哋，翌仗轉由祈普敦操刀，跑田草千二米，以二十一倍冷門身分跑得第二名，成績好過由潘頓騎多多聲，所以今次再度列陣千二米，祈普敦依然保得帥權，話晒用佢即有好成績交出，羅富全亦好保護曾經替佢馬房有戰功嘅騎師，既然祈普敦跑得好「錶之寶寶」，無理由換人跑。周二朝早，倉主親自押送「錶之寶寶」到機坪踱步，又親自押返馬房教閘，賽前動態咁緊張，擺明要再接再厲。