■《蘋果日報》大字標題話「梁耀忠推莊拒當主席，工聯會接手」。 《蘋果日報》網頁截圖街工立法會議員梁耀忠（白頭忠）今年似乎犯太歲，之前喺解散旺角勞工組一事上俾自己人圍插，近日又被網民回帶，話佢主動放棄咗做一個小組委員會嘅主席，結果委員會由建制派議員做咗。唔少人鬧爆梁耀忠，話佢唔想做議員就唔好生人霸死地，又話一定會叫親戚朋友下次選舉唔投佢。不過，有激進派中人就話，其實喺嗰次會議，提出成立委員會嘅工黨議員張超雄遲到，公民黨議員郭家麒連個選舉都無參與，但黃絲就直接無視，分明係打落水狗，到選舉時「自己友」就可以搶埋佢個位。
有網民近日回帶，話立法會根據《建造業議會條例》及《肺塵埃沉着病及間皮瘤（補償）條例》提出的擬議決議案成立的小組委員會，在本月6日舉行首次會議。資歷較深的梁耀忠按慣例在選出委員會主席前主持會議。
再拒做主席被黃絲鬧爆
據說，當時梁耀忠、民建聯議員黃定光和勞聯議員潘兆平3人在席。黃定光提名梁耀忠擔任委員會主席，梁耀忠就耍手擰頭，反而提名黃定光做主席。不過，黃定光就話自己冇時間再擔任多一個主席職位，仲質問：「成立委員會嗰兩個都唔在場，郭家麒同張超雄都唔嚟。」
由於傾唔掂，立法會秘書建議暫停會議10分鐘。張超雄和工聯會議員何啟明其後進入會議室，張超雄就再提名梁耀忠出任主席，惟梁耀忠仍然唔肯，張超雄則指自己要擔任人事編制小組委員會委員而唔做。最後，何啟明在梁耀忠及張超雄沒有反對下出任主席一職。
梁耀忠在回覆傳媒查詢時解釋，建制和「泛民」在有關議題上爭議不大，故他覺得「邊個做（主席）都可以」，而擔任主席或會帶來掣肘，故自己希望透過委員身份，以勞工角度就議題發表更多意見。
不過，黃絲就唔受佢解釋。「Max Hui」揶揄佢：「梁耀忠立法會同區議會個位邊個做都可以，唔洗（使）再做議員，用民間組織以勞工角度反映意見麻（嘛）！」
「William Wong」更破口大罵：「選你做議員，要議政，要當仁不讓，要迎難而上，用僅有嘅權力協助市民監督政府，何況做主席，船頭驚鬼船尾驚賊，要你嚟做乜？何不早點歸去？霸住廁所唔屙屎，選個有魄力但冇經驗後生仔，好過你縮頭烏龜。」
唔講郭家麒張超雄都推
撐「獨」嘅中文大學講師劉正，竟然為梁耀忠「抱不平」：「香港人睇政治從來膚淺，就係當武俠片咁睇，佢地（哋）最鍾意就係搵個大奸角出黎（嚟）標籤佢，然後就將所有責任推響佢身上，其他衰人就可以輕輕放過，完全唔理。」
佢以呢件事為例：「問題係點解最尾會令到建制派議員做咗主席呢？原來係因為提出成立委員會嘅張超雄遲到，郭家麒更加可能連個選舉都無參與到。喂，當你班黃屍，甚至所謂『開明民主派支持者』，響度狂鬧梁耀忠果（嗰）陣，有無諗過點解同樣係委員會成員嘅郭家麒、張超雄一樣無做到委員會主席呢？」
劉正認為最「正」嘅係：「原來《蘋果日報》（報道）係完全刪咗呢段『花絮』，響梁耀忠推搪唔做主席之後，一『剪』就剪接到去何啟明當選主席，郭家麒同張超雄出席會議，好似呢兩條友遲到係完全無責任要負、無事發生一樣！」
佢分析：「我當然明白由肥佬黎開始，成個『飯民』大台個『策略』響邊啦，佢地（哋）就係要打死梁耀忠，等下次『超區』選舉踢走佢換個『飯民』新人入去選丫（吖）嘛，打×埋張超雄同郭家麒就唔合算啦！所以講到最尾，《蘋果》講乜你就信乜嘅『後真相時代』之下，黃屍只會被操縱成為無主見甚至無意識嘅選舉棋子，而諷刺嘅係，佢地（哋）仲以為自己經已明辨是非、主持正義。」
■香港文匯報記者 陳川