■林紹輝唔理好醜，係咪都鬧咗先，喺fb發帖公審巴士司機玩嘢阻路。 fb截圖林生咩又再係你呀？已經瘀過N咁多次嘅民主黨石籬北區議員林紹輝又嚟「找死」：佢昨日喺fb發帖話收到街坊報料，指石蔭路一度大擠塞，原因係「巴士玩野（嘢）中」。唔少網民指出，有關巴士是因為被其他車輛阻住而唔夠位轉彎，並狠批林紹輝為咗抽水，唔去用議員身份解決區內的違泊問題，而係喺仍未了解詳情的情況下公開老屈有關的九巴司機，分分鐘累人無咗份工，反映其能力低下。民建聯立法會議員陳恒鑌更發帖，要求林紹輝向有關的巴士司機道歉。
林紹輝近排連環炒車，包括話工聯會葵盛西區議員劉美璐反對利用原有巴士47X號嘅資源，令運輸署撤回47B石籬往沙田嘅巴士喎，被批評唔追究運輸署同九巴，而抹黑為居民爭取權益嘅區議員，完全係本末倒置，最終令到佢都要補鑊，拾人牙慧去運輸署同九巴示威抗議撤回決定喎，真係樣衰。
衰過幾鑊，以為林紹輝會汲取教訓啦，但學阿寶話齋，人類總係要重複同樣的錯誤。佢昨晨喺自己fb發帖，其中上載咗幾張巴士喺路口位停喺度嘅相，同埋有人鬧交嘅短片，然後就話：「石蔭路巴士玩野（嘢）中，警察已到場。」
fb公審巴士司機「玩嘢」
堂堂一個議員開地球post公審一個司機，佢嘅支持者梗係信到十足十，猛鬧個巴士司機。好衰唔衰，林紹輝就喺「馬路的事討論區」fb群組發該帖，以為可以搵威，但該群組唔係佢同溫層噃，留言嘅網民都鬧爆林紹輝公審巴士司機。
陳恒鑌批抽水促道歉
民建聯新界西立法會議員陳恒鑌發帖道：「明明係兩邊路旁被違泊車頂住，搞到巴士過唔到，當區議員居然反指控 『巴士玩野（嘢）中』！半桶水議員，搞清楚先發炮好嗎？抽少一陣水唔洗（使）死㗎！」帖中並標註了「要求鴿黨議員向巴士司機道歉」。
「李翺邦」就根據林紹輝上載嘅相，指出：「部小巴攝得咁埋，點走呀部巴士！」林紹輝辯稱：「有街坊話開頭彎位泊咗車，巴士過唔到，部專線在左面想偷位，架巴士唔肯開車。」
當時喺現場嘅「Ming Li」就反駁：「岩（啱）岩（啱）我路過（彎位）肯定係巴士唔夠過......如果司機認為自己無咁既（嘅）技術過而唔開車，咁都有錯？」
「Gear Wong」亦狠批：「作為當區議員希望你要求警方加強執法違例泊車，彎位全日禁區，唔係話巴士玩嘢，錯重點。」
眼見群情洶湧，林紹輝做咗兩樣嘢，一就係「出賣報料街坊」，將對方嘅報料放上網，二係即改post，補充返「這位置是黑點位，運輸署建議彎位右面近商鋪（舖）加雙黃（線）但遭反對......有咩對策」等等。
咁擺明係推卸責任畀位報料街坊啫！
「Dios Lung」就質問：「係唔係要搬龍門？衰左（咗）咪認左（咗）佢至少會有人欣賞。但人無恥真係無敵！」
「智輝」批評：「你貴為議員點解唔正視私家車亂泊車呢個問題反而話巴士唔啱，身為地區議員唔處理亂泊車呢個問題反而喺網上看圖作文人講乜就信，成件事你有冇真正了解過分析過先出post呢？第一句就（話）係巴士錯我覺得你唔夠中立而且分析能力好低囉，你咁樣以後仲可以點叫人支持你呀！」
「Mui Mui Lam」更回帶返民主黨大圍區議員吳錦雄被揭發包「屎坑䐓v一事時，同樣將責任推卸在義工身上，「你地（哋）民主黨入黨前係咪教左（咗）有事就A字膊？你就賴街坊俾（畀）錯料，你啲黨友端午節就派屎坑䒏琚]畀）啲老人家食，就賴義工處理得唔好！」
「Chong Ping」亦回帶返林紹輝曾在網上發佈一段他聲稱自己阻攔了一名「跟蹤女士進廁所」男子的片段。片中林紹輝表現激動，大叫大嚷，令該名疑似智障或精神有問題男子受驚。不少網民看不過眼，指該男子「好明顯（係）智障， 或智商有問題的人士，應該用心去幫下（吓）佢才是正確，而不是嚇佢或者凶（兇）佢」，又批評林紹輝「處理不當，後果有可能好嚴重」。 ■香港文匯報記者 陳川