■董敏莉現已懷孕四個多月。香港文匯報訊（記者 李思穎）董敏莉（Monie）宣佈造人成功，現已懷孕四個多月，初期孕吐情況嚴重，令到這位準媽媽心情低落。不過Monie不忘自娛，在網上公佈喜訊，更以「婚姻出現了第三者」來形容她和老公的愛情結晶品，一度引起親友擔心！
Monie表示懷孕初期很辛苦，「因害喜反應很大，孕吐嚴重，嘔心頭暈、胃脹，樣樣齊，無晒心機，所以匿埋屋企幾個月，幾乎無見親戚朋友。現時覺得口淡、口苦，胃口依然欠佳，『佗B』之後只用清水洗臉，幾個月無用過護膚品，有時失落到不洗澡不洗頭，每日食完便嘔， 嘔完就瞓，都幾辛苦㗎！」
她指首次產檢照超聲波時， 發現子宮長了頗大的子宮肌瘤：「起初好擔心個肌瘤會影響BB， 幸好經醫生檢驗，肌瘤位置暫時沒有影響BB生長， 不過都要定期檢查，以防萬一。」Monie在社交平台上載了BB的超聲波相片，但她拒絕透露BB性別：「無論是小王子定小公主，我哋都同樣開心，我同老公都想幫BB改個男女通用的中文名，每次睇呢張超聲波相都覺得好似粒小櫻桃、好可愛，仲見到佢伸隻腳仔出嚟。」Monie自爆老公不愛上鏡，每次拍家庭照多是老公的側臉，就像賭神一樣，現刻她除了電台工作之外，會專心養胎，她謂：「會試下播法文兒歌畀BB聽，又講下生活趣事，最緊要是BB健康開心！」